کانگو میں کشتی الٹنے کے 2 حادثات میں طلبا سمیت 193 افراد ہلاک

ہفتہ 13 ستمبر 2025 22:52

کانگو (اُردو پوائنٹ اخبارتازہ ترین - آن لائن۔ 13 ستمبر2025ء) جمہوریہ کانگو کے شمال مغربی صوبہ ایکویٹیئر میں اس ہفتے 2 الگ الگ کشتی حادثات میں کم از کم 193 افراد جاں بحق اور درجنوں لاپتا ہو گئے۔ حکام کے مطابق پہلا حادثہ باسانکوسو علاقے میں پیش آیا جہاں ایک موٹرائزڈ کشتی الٹنے سے 86 افراد ہلاک ہوئے جن میں زیادہ تر طلبا شامل تھے۔دوسرا بڑا حادثہ لوکولیلا علاقے میں پیش آیا جب تقریباً 500 مسافروں سے بھری کشتی میں آگ لگنے کے بعد وہ ڈوب گئی۔

وزارتِ انسانی امور کے مطابق حادثے میں 107 افراد ہلاک ہوئے جبکہ 209 افراد کو زندہ بچا لیا گیا۔ وزارتِ سماجی امور کی ایک رپورٹ میں بتایا گیا کہ 146 افراد لاپتا ہیں۔ریاستی میڈیا کے مطابق پہلے حادثے کی وجہ غلط لوڈنگ اور رات کے وقت سفر تھی۔

(جاری ہے)

مقامی سماجی تنظیموں نے ہلاکتوں کی تعداد سرکاری اعدادوشمار سے کہیں زیادہ قرار دی ہے۔حکام اور مقامی رضاکاروں نے بچاؤ کے آپریشن میں حصہ لیا جبکہ حکومت نے زخمیوں کو طبی سہولیات، لواحقین کو مدد اور زندہ بچ جانے والے مسافروں کو ان کے آبائی علاقوں میں پہنچانے کا اعلان کیا ہے۔

واضح رہے کہ کانگو کے وسیع بارانی جنگلاتی علاقوں میں دریا ہی آمد و رفت کا سب سے اہم ذریعہ ہیں۔ پرانی اور خستہ کشتیوں پر گنجائش سے زیادہ مسافر اور سامان لادنا معمول ہے، جب کہ لائف جیکٹس نہ ہونے اور رات کے وقت سفر کرنے کے باعث حادثات میں زیادہ جانی نقصان ہوتا ہے۔