لوئر دیر، سیکیورٹی فورسز کی کارروائی، فتنہ الہندوستان کے 10 خوارج جہنم واصل، 7جوان شہید

گھنائونے اقدامات میں افغان شہری براہِ راست ملوث ، امید ہے عبوری افغان حکومت اپنی ذمے داریاں پوری ،سر زمین دہشت گردی کیلئے استعمال نہیں ہونے دے گی،آئی ایس پی آر

ہفتہ 13 ستمبر 2025 21:50

راولپنڈی (اُردو پوائنٹ اخبارتازہ ترین - این این آئی۔ 13 ستمبر2025ء) سیکیورٹی فورسز نے لوئر دیر کے علاقے لال قلعہ میں کارروائی کے دوران بھارتی اسپانسرڈ 10خوارج ہلاک کردیئے جبکہ مادرِ وطن کے 7سپوت دہشت گردوں کا بہادری سے مقابلہ کرتے شہید ہو گئے۔ آئی ایس پی آر کے مطابق شہید ہونے والوں میں نائیک عبدالجلیل، نائیک گل جان، لانس نائیک عظمت اللہ، سپاہی عبدالمالک، سپاہی محمد امجد، سپاہی محمد داود اور سپاہی فضل قیوم شامل ہیں۔

(جاری ہے)

ترجمان کے مطابق بہادر سپوت خوارج کے یرغمال بنائے گئے معصوم شہریوں کی جانیں بچاتے ہوئے شہید ہوئے ہیں، خفیہ اطلاعات کے مطابق ان گھنائونے اقدامات میں افغان شہری براہِ راست ملوث ہیں۔ترجمان کے مطابق پاکستان توقع رکھتا ہے کہ عبوری افغان حکومت اپنی ذمے داریاں پوری کرے گی اور اپنی سر زمین دہشت گردی کیلئے استعمال نہیں ہونے دے گی۔آئی ایس پی آر کے مطابق علاقے میں کسی بھی بھارتی سر پرست یافتہ خوارج کے خاتمے کے لیے کلیئرنس آپریشن جاری ہے، بھارتی اسپانسرڈ دہشت گردی کے ناسور کو جڑ سے اکھاڑ پھینکنے کے لیے پرعزم ہیں، ہمارے بہادر سپوتوں کی قربانیاں ہمارے عزم کو مزید مضبوط کرتی ہیں۔