پاکستان اعوان کونسل نے صوبہ پوٹھوہار بنانے کے مطالبے کی حمایت کر دی

صوبہ پوٹھوہار کی تعمیر و ترقی اور یہاں کے عوام کے حقوق کے لیے انتظامی بنیادوں پر صوبہ کا قیام درست سمت میں درست قدم ہے، مصطفی ملک

اتوار 14 ستمبر 2025 18:55

اسلام آباد(اُردو پوائنٹ اخبارتازہ ترین - این این آئی۔ 14 ستمبر2025ء)پاکستان اعوان کونسل نے صوبہ پوٹھوہار بنانے کے مطالبے کی حمایت کر دی ۔ اتوار کو پاکستان اعوان کونسل کے بانی صدر اور پاکستان مسلم لیگ (ق) کے مرکزی سیکرٹری اطلاعات غلام مصطفی ملک نے تحریک صوبہ پوٹھوہار کے کنوینر زاہد ملک سے ٹیلی فون پر گفتگو کی۔مصطفی ملک جو وزارت اوورسیز پاکستانیز کے فوکل پرسن بھی ہیں نے زاہد ملک کو تحریک صوبہ پوٹھوہار شروع کرنے پر مبارکباد دی ۔

(جاری ہے)

انہوںنے گفتگو کرتے ہوئے کہاکہ صوبہ پوٹھوہار کی تعمیر و ترقی اور یہاں کے عوام کے حقوق کے لیے انتظامی بنیادوں پر صوبہ کا قیام درست سمت میں درست قدم ہے۔مصطفی ملک نے زاہد ملک سے گفتگو میں کہاکہ وفاقی دارالحکومت کے باشندے ہونے کے باوجود پوٹھوہار کے عوام بنیادی سہولیات کو ترس رہے ہیں،دونوں رہنماؤں نے انتظامی بنیادوں پر پوٹھوہار صوبے کی تشکیل کے لئے مل کر کام کرنے پر اتفاق کیا ،زاہد ملک نے مصطفی ملک کو سینیئر سیاستدان محمد علی درانی اور دیگر شخصیات سے اپنی ملاقاتوں کے حوالے سے بھی آگاہ کیا۔