پی ڈی ایم اےنے خیبر پختونخوا میں 19 ستمبر تک بارشوں کے نئے سپل کی پیشنگوئی کر دی

ایبٹ آباد (اُردو پوائنٹ اخبارتازہ ترین - اے پی پی۔ 15 ستمبر2025ء) پراونشل ڈیزاسٹر مینجمنٹ اتھارٹی (پی ڈی ایم اے) نے خیبر پختونخوا میں 19 ستمبر تک بارشوں کے نئے سپل کی پیشنگوئی کرتے ہوئے ہائی الرٹ جاری کر دیا۔ پراونشل ڈیزاسٹر مینجمنٹ اتھارٹی خیبر پختونخوا نے محکمہ موسمیات کی پیشنگوئی کی روشنی میں19 ستمبر تک خیبر پختونخوا کے مختلف علاقوں میں وقفہ وقفہ سے مزید بارشوں، آندھی، گرج چمک اور بعض مقامات پر موسلادھار بارشوں کا امکان ظاہر کرتے ہوئے متعلقہ ضلعی انتظامیہ اور اداروں کو الرٹ رہنے کی ہدایت جاری کی ہے۔

16 تا 19 ستمبر کے دوران صوبہ کے بالائی اضلاع دیر (بالائی و زیریں)، چترال (بالائی و زیریں)، سوات، کوہستان (بالائی و زیریں)، کولئی پالس، شانگلہ، بٹگرام، مانسہرہ، ایبٹ آباد، ہری پور، بونیر، ملاکنڈ، باجوڑ، مہمند، کوہاٹ، پشاور، چارسدہ، نوشہرہ، مردان، صوابی، خیبر، اورکزئی، کرم، ہنگو، کرک، شمالی و جنوبی وزیرستان میں وقفہ وقفہ سے گرج چمک کے ساتھ تیز آندھی اور بارش کا امکان ہے۔

(جاری ہے)

18 سے 19 ستمبر کے دوران شدید بارشوں کے باعث دیر (بالائی و زیریں)، چترال (بالائی و زیریں)، سوات، شانگلہ، بونیر، کوہستان (بالائی و زیریں)، مانسہرہ، ایبٹ آباد، چارسدہ، نوشہرہ، صوابی اور مردان کے مقامی نالوں/دریائوں میں پانی کے بہائو میں اضافہ کا خدشہ ہے۔ پی ڈی ایم اے کی جانب سے کہا گیا ہے کہ اس دوران بارشوں کے باعث ایبٹ آباد، بٹگرام، بونیر، چترال (بالائی و زیریں)، دیر (بالائی و زیریں)، خیبر، کوہستان (بالائی و زیریں)، کولئی پالس، کرم، ملاکنڈ، مانسہرہ، مہمند، اورکزئی، شانگلہ، سوات، تورغر اور شمالی وزیرستان کے حساس پہاڑی علاقوں میں لینڈ سلائیڈنگ کا بھی خدشہ ہے۔

مراسلہ میں خبردار کیا جاتا ہے کہ تیز ہوائوں اور گرج چمک کے باعث کمزور مکانات، بجلی کے کھمبے، اشتہاری بورڈز اور سولر پینلز کو نقصان پہنچ سکتا ہے۔ اس سلسلہ میں تمام ضلعی انتظامیہ کو ضروری احتیاطی اقدامات، نکاسی آب کے نظام کی صفائی اور مقامی آبادی، سیاحوں اور مسافروں کو بروقت آگاہی فراہم کرنے کی ہدایات دی گئی ہیں۔ پی ڈی ایم اے نے کاشتکاروں، مویشی پال حضرات اور سیاحوں کو خصوصی ہدایات جاری کرتے ہوئے کہا کہ فصلوں اور جانوروں کو محفوظ مقامات پر منتقل کیا جائے اور سیاح خطرناک مقامات پر جانے سے گریز کریں۔