قائد اعظم اکادمی قومی ورثہ و ثقافت کے زیر اہتمام قائد اعظم کی 77ویں برسی کی مناسبت سے اردو یونیورسٹی میں محفل مشاعرے کا انعقاد

پیر 15 ستمبر 2025 21:10

کراچی (اُردو پوائنٹ اخبارتازہ ترین - اے پی پی۔ 15 ستمبر2025ء) قائد اعظم محمد علی جناح کی 77ویں برسی کی مناسبت سے قائد اعظم اکادمی قومی ورثہ و ثقافت ڈویژن حکومت پاکستان کے زیر اہتمام وفاقی اردو یونیورسٹی برائے فنون سائنس اور ٹیکنالوجی کے تعائون سے ڈاکٹر عبد القدیر خان آڈیٹوریم گلشن اقبال کیمپس اردو یونیورسٹی کراچی میں ایک شاندار محفل مشاعرے کا انعقاد ہواجس کے مہمان خصوصی رجسٹرار وفاقی اردو یونیورسٹی ڈاکٹر سعدیہ خلیل سمیجہ تھی۔

پیر کو جاری اعلامیہ کے مطابق مشاعرے کی صدارت معروف شاعر خالد معین نے کی اور شاعرہ افروز رضوی نے نظامت کے فرائض انجام دئے۔ اس موقع پر قائد اعظم اکادمی کے روح رواں و محفل مشاعرے کے میزبان زاہد حسین ابڑو نے بانی پاکستان قائد اعظم محمد علی جناح کو زبردست خراج عقیدت پیش کرتے ہوئے کہا کہ اگر ہم قائد اعظم کے مشن کو پورا کرنا چاہتے ہیں تو ہمیں اپنے رویوں میں سچائی محنت اتحاد اور برداشت پیدا کرنا ہوگی اور ہمیں مل کر پاکستان کو ایک ایسی ریاست بنانا ہوگا جس پر قائد اعظم کی روح کو چین و قرار آسکے۔

(جاری ہے)

شعرا ء میں خالد معین ،قمر الزماں صدیقی ،ابصار احمد، پروفیسر شائستہ سحر یاسمین ،یاس آئرین فرحت شامل تھی۔ آخر میں مہمان خصوصی ڈاکٹر سعدیہ خلیل سمیجہ نے قائد اعظم کی عظمت کو سلام پیش کیا اور کہا کہ قائد اعظم نے انتھک محنت و جدوجہد سے پاکستان کا قیام ممکن بنایا ہے انہیں جتنا بھی خراج عقیدت پیش کیا جائے کم ہوگا ۔