آبی بحران سے نمٹنے کیلئے سب کو متحدہ ہونا چاہیے ورنہ آئندہ جنگیں پانی کے مسئلہ پر ہی لڑی جائیں گی

منگل 16 ستمبر 2025 21:48

رحیم یار خان (اُردو پوائنٹ اخبارتازہ ترین - آن لائن۔ 16 ستمبر2025ء) پاکستان کی سلامتی اور استحکام کی خاطر آبی بحران سے نمٹنے کیلئے سب کو متحدہ ہونا چاہیے ورنہ آئندہ جنگیں پانی کے مسئلہ پر ہی لڑی جائیں گی۔ تمام صوبے متفقہ واٹر پالیسی تشکیل دیں۔ اگر ایسا نہ کیا گیا تو مستقبل میں ناقابل برداشت نقصان کا سامنا کرنا پڑے گا۔ ان خیالات کا اظہارایگری فورم پاکستان (رجسٹرڈ) کے مرکزی صدر چودھری احمد علی اختر، چودھری بلال احمد گجر، میاں خرم منیر، عظمت خان نیازی، چودھری زاہد ارشاد، چودھری وسیم شہزاد، پروفیسر(ر) چودھری اشفاق حسین نمبردار اور چودھری آصف خادم نے میڈیا سے گفتگو کرتے ہوئے کیا۔

انھوں نے کہا کہ پاکستان کو آبی جارحیت کا نشانہ بنانے کے لیے بھارت نے پاکستان سے آنے والے دریاؤں کے پانی پر بند باندھ کر اپنی ضرورت سے زیادہ ذخیرہ آب کے لیے بڑی تعداد میں چھوٹے بڑے ڈیم بنالیے ہیں اور ہم نے ڈیم کے منصوبے کو متنازعہ بنا کر رکھ دیا ہے جس کی وجہ سے آج پاکستان کو پانی کے سنگین بحران کا سامنا ہے۔

(جاری ہے)

جس میں وقت گزرنے کے ساتھ ساتھ شدت آتی جارہی ہے۔

انھوں نے کہا کہ چیف جسٹس(ر) میاں ثاقب نثار کی آبزرویشن سے کوئی اختلاف نہیں کرے گا کہ اگر یہی صورت حال رہی تو مستقبل میں ہمارے بچوں کو پانی نہیں ملے گا۔ہمارے لیے یہ لمحہ فکریہ ہے کہ پاکستان تیزی سے ایسے ملکوں کی صف میں شامل ہونے جارہا ہے جنہیں آئندہ برسوں میں پانی کی قلت کے اس قدر شدید بحران کا سامنا ہوگا کہ اسے قحط کے خطرات کا سامنا کرنا پڑسکتا ہے۔

انھوں نے کہا کہ ان حالات کے پیش نظر متفقہ قومی آبی پالیسی اختیار کرنے کی ضرورت ہے۔ واٹر سیکورٹی کے معاملات ہماری قومی ترجیحات میں سب سے آگے ہونی چاہیں تاکہ ہمارا مستقبل تابناک ہوسکے۔ ہمیں ایک قوم بن کر سوچنا چاہیے اورپاکستان کی سلامتی، بقاء اور استحکام کے لیے آبی بحران سے نمٹنے کے لیے سب کو یکسو ہونا چاہیے۔