بھارت ، آن لائن گیم میں والد کی جمع پونجی ہارنے پر 13 سالہ لڑکے نے خودکشی کر لی

بدھ 17 ستمبر 2025 08:40

ممبئی (اُردو پوائنٹ اخبارتازہ ترین - اے پی پی۔ 17 ستمبر2025ء) بھارت کی شمالی ریاست اتر پردیش کے دارالحکومت لکھنؤ کے علاقے موہان لال گنج میں ایک 13 سالہ لڑکے نے آن لائن گیم میں اپنے والد کے تمام پیسے گنوا دینے کے بعد خوف کے باعث پھندا لگا کر جان دے دی۔عر ب نیوز کے مطابق پولیس نے بتایا کہ اس گیم میں لڑکے نے ایک لاکھ 40 ہزار روپے (تقریباً 16 ہزار ڈالر) ہار دیے جو کہ اس کے والد کے بینک کھاتے کی کل رقم تھی۔

(جاری ہے)

پولیس افسر ڈی کے سنگھ نے بتایا کہ چھٹی جماعت کا یہ طالب علم پیر کے روز اس وقت شدید خوفزدہ ہو گیا جب اس کے والد نے بینک کا دورہ کرنے کے بعد یہ جانا کہ ان کا اکاؤنٹ خالی ہو چکا ہے۔پولیس کے مطابق لڑکے کے والد نے بینک منیجر کے پاس شکایت درج کرائی اور گھر آ کر سارا معاملہ اہل خانہ کو بتایا۔ یہ سن کر لڑکا ڈر کے مارے اوپر والی منزل پر گیا اور یہ کہہ کر اپنے کمرے میں چلا گیا کہ اسے سبق یاد کرنا ہے۔ مگر کچھ دیر بعد اس نے کمرے میں پھندا لگا کر اپنی جان لے لی۔یہ واقعہ اس وقت سامنے آیا جب شام کو اس کی بہن کمرے میں گئی اور بھائی کو لٹکا ہوا پایا۔ گھر والوں نے چیخ و پکار سن کر فوری طور پر اسے اتارا اور کمیونٹی ہیلتھ سینٹر پہنچایا جہاں ڈاکٹروں نے اس کی موت کی تصدیق کر دی۔