ٹریفک قوانین سخت، گاڑیاں وموٹرسائیکلیں نیلام ہوں گی

قیمت سے زیادہ جرمانے والی 129 موٹرسائیکلیں پکڑی گئیں، جلد نیلامی ہو گی ‘ اطہر وحید

بدھ 17 ستمبر 2025 14:43

لاہور (اُردو پوائنٹ اخبارتازہ ترین - این این آئی۔ 17 ستمبر2025ء) ٹریفک پولیس نے بار بار ٹریفک قوانین کی خلاف ورزیاں کرنے سے خبردارکردیا، بار بار خلاف ورزیاں کرنے والوں کی گاڑیاں وموٹرسائیکلیں نیلام ہوں گی۔اس حوالے سے چیف ٹریفک آفیسر لاہور ڈاکٹر اطہر وحید کا کہنا تھا کہ موٹرسائیکل کی قیمت سے زیادہ جرمانے والی 129 موٹرسائیکلیں پکڑی گئیں، موٹر سائیکلوں کی مالیت سے زیادہ جرمانوں کی بنا پر جلد نیلامی کی جائے گی ۔

(جاری ہے)

129موٹرسائیکل مالکان میں کم از کم 1لاکھ ،زیادہ سے زیادہ 3 لاکھ 74 ہزار جرمانے واجب الادا ہیں، موٹرسائیکلوں کی نیلامی کے لئے سیف سٹیز کو مراسلہ لکھ کر جلد نیلامی کا عمل شروع ہو گا۔شہری کوای چالانز پر اگر اعتراض ہے توٹریفک پولیس سے رابطہ کر سکتا ہے، مینول چالاننگ سے ای چالاننگ پر پورا نظام جلد منتقل ہو رہا ہے۔وارڈن ایپ کی اپ گریڈیشن کے بعد وصولیوں میں 10 گنا اضافہ ہوا ہے، نیلامی کے لئے پکڑی گئی موٹرسائیکل مالکان کوفون کرکے آگاہ کیاگیا ہے۔