سرکاری اسکولوں کو پرائیویٹ مافیا کے حوالے کرنے کا فیصلہ فوری واپس لیا جائے‘ ضیاء الدین انصاری

بدھ 17 ستمبر 2025 16:36

لاہور (اُردو پوائنٹ اخبارتازہ ترین - این این آئی۔ 17 ستمبر2025ء) جماعت اسلامی لاہور کے امیر ضیاء الدین انصاری ایڈووکیٹ نے پنجاب حکومت کی جانب سے یکم اکتوبر سے تمام سرکاری اسکولوں کو آؤٹ سورس کرنے کے فیصلے کو سختی سے مسترد کرتے ہوئے اسے تعلیم دشمن پالیسی قرار دیا ہے۔سید مودودی اسلامک سنٹر میں جماعت اسلامی کے تحت قائم بنو قابل آئی ٹی سنٹر کے دورے کے موقع پر میڈیا سے گفتگو کرتے ہوئے انہوں نے کہا کہ یہ فیصلہ پنجاب میں تعلیم کا قتل عام ہے۔

انہوں نے مزید کہا کہ اس اقدام سے نہ صرف ہزاروں غریب ملازمین بے روزگار ہوں گے بلکہ لاکھوں غریب بچوں کے لیے تعلیم کا دروازہ بھی بند ہو جائے گا۔ انہوں نے سوال اٹھایا کہ کیا تعلیم کو بیچنے سے پاکستان ترقی کرے گا کیا غریب بچوں کو تعلیم سے محروم کر کے خوشحال پاکستان بنایا جا سکتا ہی ضیاء الدین انصاری نے مطالبہ کیا کہ تعلیم کو سب کے لیے مفت اور آسان بنایا جائے، اور سرکاری اسکولوں کو پرائیویٹ مافیا کے حوالے کرنے کا فیصلہ فوری واپس لیا جائے۔

(جاری ہے)

انہوں نے کہا کہ غریب کے بچوں کو بھی امیر کے برابر تعلیم کا حق حاصل ہے، اور تعلیم بیچنے والے پاکستان کے مستقبل کے دشمن ہیں۔اس موقع پر انچارج بنو قابل آئی ٹی سنٹر عثمان افضل نے امیر جماعت اسلامی کو بنوقابل پروگرام کی تفصیلات سے آگاہ کیا۔ انہوں نے بتایا کہ الخدمت فاؤنڈیشن کا بنو قابل آئی ٹی پروگرام لاکھوں نوجوانوں کی زندگیاں بدل رہا ہے۔ نوجوانوں کو مفت آئی ٹی کی تعلیم دے کر انہیں باعزت روزگار کے قابل بنایا جا رہا ہے جو کہ ملک و قوم کی ترقی کی جانب ایک مثبت قدم ہے۔