شنگھائی میں چین کی مشہور یوٹونگ بس کمپنی کے حکام نے صوبائی وزراء سے ملاقات کی،سرمایہ کاری کے حوالے سے تبادلہ خیال

بدھ 17 ستمبر 2025 20:30

کراچی (اُردو پوائنٹ اخبارتازہ ترین - اے پی پی۔ 17 ستمبر2025ء) چین کے شہر شنگھائی میں چین کی مشہور یوٹونگ بس کمپنی کے حکام نے سندھ کے سینئر وزیربرائے اطلاعات، ٹرانسپورٹ و ماس ٹرانزٹ شرجیل انعام میمن اور صوبائی وزیر برائے توانائی، ترقی و منصوبہ بندی سید ناصر حسین شاہ سے ملاقات کی اورسندھ میں ٹرانسپورٹ اور توانائی کے شعبوں میں سرمایہ کاری کے مواقع پر تفصیلی تبادلہ خیال کیا۔

بدھ کویہاں جاری اعلامیہ کے مطابق ملاقات میں دونوں فریقوں نے ٹرانسپورٹ اور متبادل توانائی کے شعبوں میں تعاون کو مزید فروغ دینے پر اتفاق کیا۔اس موقع پریوٹونگ حکام نے وزراء کو اپنی نئی اور جدید ماڈل بسوں کے بارے میں بریفنگ دی اور پاکستان، بالخصوص سندھ میں اپنی بسیں متعارف کرانے میں دلچسپی کا اظہار کیا۔

(جاری ہے)

سندھ کے سینئر وزیرشرجیل انعام میمن نے کہا کہ سندھ حکومت شہریوں کو معیاری اور محفوظ ٹرانسپورٹ فراہم کرنے کے لیے پرعزم ہے، دھابیجی اسپشل اکنامک زون میں غیر ملکی سرمایہ کاروں کے لیے بڑا موقع ہے اور سرمایہ کاروں کو دھابجی اسپیشل اکنامک زون میں دس سالہ ٹیکس چھوٹ دی جارہی ہے اور ساتھ ساتھ حکومت سندھ اس زون میں بین الاقوامی سرمایہ کاروں کو تمام ممکنہ سہولتیں فراہم کر رہی ہے۔

انہوں نے کہا کہ سندھ میں ٹرانسپورٹ کے شعبے میں بڑے پیمانے پر اصلاحات کی ضرورت ہے اور کراچی سمیت صوبے کے دیگر شہروں میں عوام کو معیاری بس سروس فراہم کرنا حکومت کی اولین ترجیح ہے۔انہوں نے کہا کہ سندھ حکومت چاہتی ہے کہ یوٹونگ جیسے بین الاقوامی ادارے پاکستان آ کر جدید بسیں تیار کریں تاکہ مقامی مارکیٹ کی ضروریات پوری کی جا سکیں۔ اس موقع پر صوبائی وزیرسید ناصر حسین شاہ نے کہا کہ سندھ حکومت ماحول دوست اور توانائی کے متبادل ذرائع پر مبنی پبلک ٹرانسپورٹ متعارف کرانے کی خواہش رکھتی ہے۔ انہوں نے کہا کہ یوٹونگ کی بسیں ماحول دوست خصوصیات اور توانائی کے متبادل ذرائع کے حوالے سے بہترین آپشن ثابت ہو سکتی ہیں۔