خیبرپختونخوا فوڈ اتھارٹی کی پشاور، نوشہرہ، مردان اور ہری پور میں بڑی کارروائیاں، مضر صحت و غیر معیاری خوراک تلف، جرمانے عائد

جمعرات 18 ستمبر 2025 19:50

پشاور (اُردو پوائنٹ اخبارتازہ ترین - اے پی پی۔ 18 ستمبر2025ء) خیبرپختونخوا فوڈ سیفٹی اینڈ حلال فوڈ اتھارٹی کی فوڈ سیفٹی ٹیموں نے ڈائریکٹر جنرل واصف سعید کی نگرانی میں پشاور، نوشہرہ، مردان اور ہری پور میں بڑی کارروائیاں کرتے ہوئے مضر صحت اور غیر معیاری خوردونوش اشیاء برآمد کرلیں۔ترجمان فوڈ اتھارٹی نے تفصیلات جاری کرتے ہوئے کہا کہ فوڈ سیفٹی ٹیم پشاور نے گزشتہ روز کوہاٹ روڈ پشاور پر واقع ایک ڈسٹریبیوشن پوائنٹ پر چھاپے کے دوران تقریباً دو ہزار لیٹر جعلی اور غیر معیاری مشروبات برآمد کرکے سرکاری تحویل میں لے لیااور پوائنٹ کو سیل کردیا اور قانونی کارروائی کا آغاز بھی کیا۔

نوشہرہ فوڈ سیفٹی ٹیم نے اکوڑہ خٹک میں ایک گاڑی سے 400 کلو باسی اور غیر معیاری چکن پارٹس پکڑ کر تلف کیے جبکہ ایک ہوٹل کی واٹر ٹینکی کی ناقص صورتحال پر گندا پانی ضائع کردیا گیا۔

(جاری ہے)

اسی طرح صوابی روڈ جھانگیری پر ایک بیکری یونٹ سے 100 کلو غیر معیاری مٹھائیاں برآمد ہوئیں جو تلف کردی گئیں۔ترجمان فوڈ اتھارٹی کا مزید کہنا تھا کہ فوڈ سیفٹی اتھارٹی مردان ٹیم نے پار ہوتی میں کارروائی کرتے ہوئے ایک مصالحہ فیکٹری سے 40 کلو چوکر، 100 کلو چوکر ملا مصالحہ اور 4 کلو غیر معیاری و مضر صحت رنگ برآمد کرلیا۔

فیکٹری میں مشہور برانڈز کے نام سے جعلی مصالحے بھی تیار کیے جارہے تھے، ملزمان کو رنگے ہاتھوں پکڑا گیا جبکہ صفائی کی ابتر صورتحال اور ورکرز کے میڈیکل سرٹیفکیٹس کی عدم دستیابی پر فیکٹری کو سیل کردیا گیا۔ اسی طرح ہری پور کی ٹیم نے حطار انڈسٹریل اسٹیٹ میں واقع ایک مشروبات بنانے والی فیکٹری پر رات گئے چھاپہ مارا۔ کارروائی کے دوران 1080 کلو ایکسپائر پلپ برآمد ہوا جو جوسز میں استعمال ہورہا تھا، جسے موقع پر تلف کردیا گیا اور پروڈکشن بند کرتے ہوئے ذمہ داروں کے خلاف قانونی کارروائی شروع کردی گئی۔

فوڈ اتھارٹی کے مطابق حفظانِ صحت کے اصولوں کی خلاف ورزی پر بھاری جرمانے عائد کیے گئے ہیں اور ذمہ دار عناصر کے خلاف فوڈ سیفٹی ایکٹ کے تحت قانونی کارروائی کا آغاز بھی کردیا گیا۔وزیر خوراک خیبرپختونخوا ظاہر شاہ طورو نے کامیاب کارروائیوں پر فوڈ سیفٹی ٹیموں کو سراہا اور کہا کہ غیر معیاری خوراک میں ملوث عناصر کسی رعایت کے مستحق نہیں، ان کے خلاف سخت کارروائی ہوگی۔ انہوں نے واضح کیا کہ عوام کی صحت پر کوئی سمجھوتہ نہیں کیا جائے گا اور شہریوں کو محفوظ خوراک کی فراہمی کو ہر صورت یقینی بنایا جائے گا۔