بھارت،محبوب کے طعنوں سے تنگ خاتون نے بیٹی کو جھیل میں پھینک دیا، مقدمہ درج

جمعرات 18 ستمبر 2025 20:25

نئی دہلی (اُردو پوائنٹ اخبارتازہ ترین - این این آئی۔ 18 ستمبر2025ء)بھارت میں خاتون نے محبوب کے طعنوں سے تنگ آکر 3 سالہ بیٹی کو قتل کرکے لاش جھیل میں پھینک دی۔بھارتی ریاست راجستھان کے شہر اجمیر میں خاتون نے آدھی رات کو اپنی بیٹی کو جھیل کے کنارے لے جانے کے بعد اسے پانی میں پھینکا اور پھر اس کے لاپتہ ہونے کا جھوٹا دعویٰ کیا۔پولیس کے مطابق انجلی نامی خاتون شوہر سے علیحدگی کے بعد اپنے آشنا آلکیش کے ساتھ رہ رہی تھی اور ایک ہوٹل میں ریسیپشنسٹ کے طور پر کام کرتی تھی، جبکہ آلکیش بھی وہیں کام کرتا تھا۔

انجلی اپنی بیٹی کی وجہ سے پریشان رہتی تھی، کیونکہ آلکیش اٴْسے بیٹی کے بارے میں اکثر طعنے دیتا تھا، جس کی وجہ سے وہ ذہنی دباؤ کا شکار تھی۔گزشتہ رات کو پولیس نے انجلی اور آلکیش کو سڑک پر گھومتے ہوئے دیکھا تو ان سے پوچھا وہ اتنی رات کو کہاں جارہے ہیں جس پر انجلی نے بتایا کہ اس کی بیٹی کہیں لاپتہ ہوگئی ہے وہ اسے تلاش کررہی ہے۔

(جاری ہے)

سی سی ٹی وی فوٹیج سے پولیس کو پتا چلا کہ انجلی اپنی بیٹی کو اپنے بازو میں اٴْٹھا کر انا ساگر جھیل کے قریب گئی تھی اور چند گھنٹے بعد وہ تنہا موبائل فون پر مصروف دکھائی دی۔

پولیس نے جھیل سے بچی کی لاش برآمد کی اور انجلی سے پوچھ گچھ کی تو اس نے اعتراف کیا کہ ذہنی دباؤ کی وجہ سے اپنی بیٹی کو جھیل میں پھنک دیا تھا۔پولیس نے ملزمہ کو گرفتار کرکے اس کے خلاف قتل کا مقدمہ درج کرلیا ہے۔