تھانہ ریس کورس پولیس کی کارروائی، خطرناک گینگ گرفتار، 75 لاکھ اور 20 موٹر سائیکل برآمد

جمعہ 19 ستمبر 2025 17:11

راولپنڈی (اُردو پوائنٹ اخبارتازہ ترین - اے پی پی۔ 19 ستمبر2025ء) تھانہ ریس کورس پولیس نے شہریوں کو گن پوائنٹ پر لوٹنے والے چار رکنی خطرناک گینگ کو گرفتار کر کے شہریوں سے چھینی گئی 75 لاکھ روپے کی رقم اور 20 موٹر سائیکل برآمد کر لیے۔پولیس کے مطابق گینگ کے ارکان نے دوران واردات ایک شہری کو فائرنگ کر کے شدید زخمی بھی کیا تھا۔ گینگ کی گرفتاری کے لیے ایس پی پوٹھوہار طلحہ ولی کی سربراہی میں خصوصی ٹیمیں تشکیل دی گئیں۔

(جاری ہے)

پولیس نے ٹیکنیکل و ہیومن انٹیلی جنس ذرائع استعمال کر کے ملزمان کو گرفتار کیا۔ملزمان نے دوران تفتیش موٹر سائیکل چھیننے اور چوری کرنے کی متعدد وارداتوں کا انکشاف کیا۔ ایس پی پوٹھوہار کے مطابق زیر حراست اشخاص کو ٹھوس شواہد کے ساتھ چالان کر کے قرار واقعی سزا دلوائی جائے گی۔ایس پی پوٹھوہار طلحہ ولی نے برآمد شدہ رقم اور موٹر سائیکل اصل مالکان کے حوالے کر دیئے۔ شہریوں نے بہترین کارکردگی پر ایس پی پوٹھوہار اور راولپنڈی پولیس کا شکریہ ادا کیا۔