ایف آئی اے کی تفتان میں کارروائی، غیر قانونی کرنسی ڈیلر گرفتار، کروڑوں کی کرنسی برآمد

ض*حوالہ ہنڈی اور غیر قانونی ایکسچینج سے جڑے اہم دستاویزات اور ریکارڈ بھی ضبط

اتوار 21 ستمبر 2025 18:20

ایف آئی اے کی تفتان میں کارروائی، غیر قانونی کرنسی ڈیلر گرفتار، کروڑوں ..

M کوئٹہ(اُردو پوائنٹ اخبارتازہ ترین - آن لائن۔ 21 ستمبر2025ء)وفاقی تحقیقاتی ایجنسی ایف آئی اے کی کمپوزٹ سرکل تفتان ٹیم نے کوئٹہ میں حوالہ ہنڈی اور غیر قانونی کرنسی ایکسچینج کے ایک بڑے نیٹ ورک کے خلاف کامیاب کارروائی کی ہے۔حکام ایف آئی اے کے مطابق ملزم شادی خان کو گرفتار کر لیا گیا ہے جو اس غیر قانونی کاروبار کا کلیدی کردار ادا کر رہا تھا۔

کارروائی کے دوران ملزم کے قبضے سے 475 ملین ایرانی ریال، 60 امریکی ڈالر، 2 لاکھ 59 ہزار پاکستانی روپے اور ایک موبائل فون برآمد ہوا ہے۔اس کے علاوہ، حوالہ ہنڈی اور غیر قانونی ایکسچینج سے جڑے اہم دستاویزات اور ریکارڈ بھی ضبط کیے گئے ہیں جو اس نیٹ ورک کی مزید گہرائیوں کو ظاہر کر سکتے ہیں۔حکام نے ایکسپریس نیوز کو بتایا کہ ایف آئی اے کا کریک ڈاون جاری ہے اور ملزم کے دیگر ساتھیوں کی گرفتاری کے لیے کوئٹہ اور آس پاس کے علاقوں میں چھاپے مارے جا رہے ہیں، یہ کارروائی ملک بھر میں غیر قانونی مالیاتی لین دین کے خلاف جاری مہم کا حصہ ہے جو معیشت کو مستحکم کرنے کے لیے ضروری ہے۔

(جاری ہے)

ایف آئی اے کے افسران کا کہنا ہے کہ حوالہ ہنڈی جیسی سرگرمیاں نہ صرف ٹیکس چوری کا سبب بنتی ہیں بلکہ ملک کی مالیاتی سلامتی کو بھی خطرے میں ڈالتی ہیں، ملزم شادی خان کے خلاف قانونی کارروائی شروع کر دی گئی ہیاور تفتیش جاری ہے۔ایف آئی اے حکام نے عوام سے گزارش کی ہے کہ وہ ایسی غیر قانونی سرگرمیوں کی اطلاع دیں تاکہ اسے روکا جا سکے۔