خیبر پختونخواہ ٹورازم اتھارٹی نمایاں ادارہ قرار، گولڈ ایوارڈ اپنے نام کرلیا

پشاور (اُردو پوائنٹ اخبارتازہ ترین - اے پی پی۔ 21 ستمبر2025ء) خیبر پختونخوا کلچر اینڈ ٹورزم اتھارٹی (CTA) نے پاشا ایوارڈز 2025 میں پبلک سیکٹر کیٹیگری (ڈیجیٹل گورنمنٹ اینڈ سٹیزن سروسز) میں گولڈ ایوارڈ حاصل کر کے صوبے کو قومی سطح پر ڈیجیٹل سیاحت میں انقلابی اقدامات کی بدولت نمایاں مقام دلایا ہے۔صوبائی سیکرٹری سیاحت کے مطابق پاشا 2025 کے مقابلے میں ملک بھر سے 1,633 اداروں نے اپنی ڈیجیٹل ایپلیکیشنز اور پلیٹ فارمز پیش کیے۔

ان میں خیبر پختونخوا کی یہ کامیابی ’’پبلک سروس ٹرانسفارمیشن‘‘ کے میدان میں ایک درخشاں مثال بن کر سامنے آئی۔ اس کے ساتھ ہی نادرا کا ای سہولت اور خیبر پختونخوا آئی ٹی بورڈ کا دستک ایپ رَنر اَپ قرار پائے، جو قومی سطح پر ڈیجیٹل جدت کے فروغ میں خیبر پختونخوا کے قائدانہ کردار کو مزید اجاگر کرتا ہے۔

(جاری ہے)

اس تاریخی موقع پر اظہارِ خیال کرتے ہوئے سیکرٹری سیاحت خیبر پختونخوا ڈاکٹر عبدالصمد نے کہا کہ بین الاقوامی معیار کے عین مطابق تیار کردہ ٹورزم ڈیجیٹل پلیٹ فارم، جو خیبر پختونخوا انٹیگریٹڈ ٹورزم (KITE) پروجیکٹ کے تحت تیار کیے گئے 34 جدید ماڈیولز پر مشتمل ہے، نے ہمارے صوبے کو قومی منظرنامے پر ممتاز کر دیا ہے۔

یہ اعزاز صرف ایک ایوارڈ نہیں بلکہ اس وژن کی تصدیق ہے جس کے تحت خیبر پختونخوا نے ٹیکنالوجی کے ذریعے سیاحتی خدمات کو نئے سرے سے متعارف کراتے ہوئے نئے مواقع پیدا کیے اور عالمی اعتماد حاصل کیا۔ ڈاکٹرعبدالصمد نے مزید کہا کہ وزیر اعلیٰ علی امین خان گنڈا پور کی بصیرت افروز قیادت میں صوبے کی سیاحتی حکمتِ عملی کو اس انداز میں ترتیب دیا جا رہا ہے کہ نہ صرف قومی سطح پر پذیرائی حاصل ہو بلکہ پاکستان بھر میں ڈیجیٹل ٹورزم ڈویلپمنٹ کے لیے ایک نیا معیار قائم ہو۔

کلچر اینڈ ٹورزم اتھارٹی کی انتھک محنت کو سراہتے ہوئےانہوں نے کہا کہ یہ ایوارڈ ہماری ٹیم کی لگن، تخلیقی سوچ اور انتھک کوششوں کا عکاس ہے۔ یہ اعزاز خیبر پختونخوا کے عوام کا ہے اور اس خواب کی تعبیر ہے کہ ہم اپنے صوبے کو دنیا کا ایک نمایاں سیاحتی مرکز بنائیں۔ جدت کو اپنے اقدامات کے مرکز میں رکھتے ہوئے ہم پائیدار، ڈیجیٹل طور پر ترقی یافتہ اور ثقافتی اعتبار سے مالامال سیاحت کے فروغ کے لیے پرعزم ہیں۔ پاشا 2025 کا گولڈ ایوارڈ ایک سنگِ میل کی حیثیت رکھتا ہے، جو نہ صرف خیبر پختونخوا کو ڈیجیٹل ٹورزم گورننس میں ایک رہنما کے طور پر تسلیم کرتا ہے بلکہ یہ عہد بھی دہراتا ہے کہ صوبہ اپنے ثقافت، ورثے اور ٹیکنالوجی کو یکجا کر کے ایک روشن مستقبل کی جانب گامزن ہے۔