ڈی پی اوصوابی کی زیر صدارت کرائم میٹنگ ،افسران کو زیر التوا مقدمات کو بروقت نمٹانے کی ہدایت

ایس پی انویسٹی گیشن صوابی افتخار علی،ایس ڈی پی اوز ، تمام ایس ایچ اوز اور تفتیشی افسران کی شرکت

اتوار 21 ستمبر 2025 17:15

صوابی(اُردو پوائنٹ اخبارتازہ ترین - این این آئی۔ 21 ستمبر2025ء)ڈسٹرکٹ پولیس آفیسر صوابی ضیا الدین احمد کی زیر صدارت کرائم میٹنگ کا انعقاد کیا گیا، جس میں ایس پی انویسٹی گیشن صوابی افتخار علی،ایس ڈی پی اوز ، تمام ایس ایچ اوز اور تفتیشی افسران نے شرکت کی۔ڈی پی او صوابی نے میٹنگ کے دوران تھانوں کی انفرادی کارکردگی، اندراج مقدمات، اشتہاری و مطلوب ملزمان کی گرفتاری اور سنگین مقدمات سے متعلق پیش رفت کا جائزہ لیا اور افسران کو سختی سے ہدایت کی کہ زیر التوا مقدمات کو بروقت نمٹایا جائے۔

لینڈ مافیا، منشیات فروشوں اور سمگلروں کے خلاف بلاامتیاز کارروائیاں مزید تیز کی جائیں،اجرتی قاتلان اور دیگر معاشرے کی ناسور کیخلاف سختی سے کارروائی عمل میں لائے جائے۔ اسی طرح ہوائی فائرنگ اور سوشل میڈیا پر بے حیائی پھیلانے والوں کے خلاف بھی سخت ایکشن لیا جائے۔

(جاری ہے)

انہوں نے واضح کیا کہ تفتیش مکمل طور پر میرٹ پر کی جائے کیونکہ میرٹ پر تفتیش ہی غریب اور مظلوم عوام کو حقیقی داد رسی فراہم کر سکتی ہے۔

ڈی پی او صوابی نے مجرمان اشتہاریوں اور مطلوب ملزمان کے خلاف کارروائیاں مزید سخت کرنے کے احکامات بھی دیے۔انہوں نے اس بات پر بھی زور دیا کہ محکمہ پولیس میں سزا و جزا کا عمل جاری رہے گا، اچھے کام کو سراہا جائے گا جبکہ ناقص کارکردگی پر قانونی کارروائی عمل میں لائی جائے گی۔