بھارت،شوہر نے بیوی کو قتل کرکے فیس بک لائیو پر اعتراف کر لیا

پیر 22 ستمبر 2025 20:30

کیرالہ (اُردو پوائنٹ اخبارتازہ ترین - این این آئی۔ 22 ستمبر2025ء)بھارتی ریاست کیرالہ کے علاقے پونالور میں شوہر نے بیوی کو چھری کے وار سے قتل کرکے فیس بک لائیو پر اپنے جرم کا اعتراف کرلیا۔بھارتی میڈیا کے مطابق کیرالہ کے علاقے پونالور کے قریب کوٹھا نادی میں ایک دل دہلا دینے والا واقعہ پیش آیا، جہاں 39 سالہ شالنی کو اس کے شوہر نے مبینہ طور پر چھری کے وار سے قتل کر دیا۔

پولیس کے مطابق ملزم آئزک نے بعد ازاں پونالور تھانے میں خود کو حکام کے حوالے کر دیا۔ایف آئی آر کے مطابق واقعہ صبح ساڑھے 6 بجے اس وقت پیش آیا جب شالنی نہانے کیلئے گئی تو اسی دوران آئزک نے اس پر حملہ کیا اور گردن، سینے اور کمر پر مہلک زخم پہنچائے۔قتل کے فوراً بعد ملزم نے فیس بک لائیو پر دو منٹ کی ویڈیو میں جرم کا اعتراف کیا اور شالنی پر بداعتمادی، زیورات کے غلط استعمال اور سیاسی سرگرمیوں میں بڑھتی شمولیت کے الزامات عائد کیے۔

(جاری ہے)

ملزم کے مطابق شالنی اکثر اس کی بات نہیں مانتی تھی اور کچھ عرصہ اپنی ماں کے گھر رہنے کے بعد حال ہی میں واپس آئی تھی۔رپورٹ کے مطابق شالنی ایک مقامی اسکول میں مددگار کے طور پر کام کرتی تھی جبکہ آئزک، جو خلیجی ملک سے واپس آیا تھا، اپنی بیوی پر تشدد کرتا رہتا تھا جس کے باعث وہ اپنی ساس کے ساتھ رہنے لگی تھی اور کچھ روز قبل ہی دوبارہ اپنے گھر لوٹی تھی۔

واقعے کی اطلاع مقتولہ کے 19 سالہ بیٹے نے پولیس کو دی جس کی بنیاد پر ملزم کے خلاف قتل کا مقدمہ درج کر لیا گیا۔پولیس نے بتایا کہ مقتولہ کی لاش ہسپتال منتقل کر دی گئی جبکہ فارنزک ٹیم نے جائے واردات کا معائنہ کیا اور دونوں کے موبائل فون قبضے میں لے لیے، ملزم اور مقتولہ کے 2 بیٹے ہیں واقعے سے متعلق مزید تفتیش شروع کر دی گئی ۔