وزیراعلیٰ پنجاب مریم نواز نے ساہیوال میں جدید ترین الیکٹرو بس پراجیکٹ کا افتتاح کردیا

پیر 22 ستمبر 2025 21:20

لاہور (اُردو پوائنٹ اخبارتازہ ترین - اے پی پی۔ 22 ستمبر2025ء) وزیراعلیٰ پنجاب مریم نواز نے ساہیوال کی تاریخ کے پہلے جدید ترین الیکٹرو بس پراجیکٹ کا افتتاح کردیا۔ وزیراعلیٰ نے ساہیوال میں الیکٹروبس سروس پر سفر کیا۔ ان کی آمد پر ساہیوال میں عوام کا جوش و خروش دیدنی تھا اور سڑک کے اطراف میں ہزاروں لوگوں کا مجمع امڈ آیا۔ عوام نے ساہیوال میں الیکٹروبس سروس کے آغاز پر مسرت کا اظہار کیا۔

ہزاروں نوجوان ساہیوال کی پہلی الیکٹرک بس کے ساتھ ساتھ چلتے رہے۔ ہجوم کی وجہ سے الیکٹرو بس رینگ رینگ کر آہستہ آہستہ چلتی رہی۔ عوام نے ساہیوال الیکٹرو بس پر پھولوں کی پتیاں نچھاور کیں۔ عوام نے محمد نواز شریف اور وزیر اعلیٰ مریم نواز کے پوسٹرز اٹھا رکھے تھے۔ وزیر اعلیٰ ای بس پر سوار ہو کر تقریب میں پہنچیں۔

(جاری ہے)

صوبائی وزیر ٹرانسپورٹ بلال اکبر بٹ نے ای بس پراجیکٹ کے بارے میں تفصیلات سے آگاہ کیا۔

وزیراعلیٰ کو بریفنگ میں بتایا گیا کہ ساہیوال میں پہلے مرحلے میں 16 الیکٹر ک بسیں ابتدائی طورپر 4روٹس پر چلائی جائیں گی۔ عارف والا بائی پاس تا سرور چوک پہلا الیکٹرو بس روٹ ہوگا۔ نور شاہ تا کے ایف سی بائی پاس بھی الیکٹرک بس چلے گی۔ فرید ٹاؤن سے یوسف والا تک الیکٹرو بس کا تیسرا روٹ ہے۔ جنرل بس سٹینڈ تا کمیر بھی الیکٹروبس چلائی جائے گی۔

بریفنگ میں مزید بتایا گیا کہ ساہیوال الیکٹرو بس پر25ہزار سے زائد مسافر روزانہ سفر کریں گے۔ساہیوال الیکٹرو بس سروس میں ہر سٹاپ کا کرایہ 20روپے مقرر کیا گیا ہے۔ الیکٹرو بس میں وائی فائی،موبائل چارجنگ اورسی سی ٹی وی کیمرے بھی نصب ہیں۔ ساہیوال الیکٹرک بس سروس میں خواتین کیلئے الگ کمپارٹمنٹ مختص کیا گیا ہے۔ الیکٹرو بس کیلئے ساہیوال میں چارجنگ سٹیشن بھی قائم کیے گئے ہیں۔