عالمی عدالت انصاف غزہ پر جنوبی افریقہ کے مقدمہ کا فیصلہ کرے، رامافوسا

یو این بدھ 24 ستمبر 2025 06:45

اسلام آباد (اُردو پوائنٹ ۔ UN اردو۔ 24 ستمبر 2025ء) جنوبی افریقہ کے صدر سیرل رامافوسا نے کہا ہے کہ پائیدار ترقی کے اہداف اور عالمگیر امن کے حصول کی خاطر دنیا میں ہر جگہ مسلح تنازعات کا خاتمہ ہونا ضروری ہے جس کے لیے عالمی برادری کو فیصلہ کن اقدامات اٹھانا ہوں گے۔

اقوام متحدہ کی جنرل اسمبلی کے عام مباحثے میں خطاب کرتے ہوئے ان کا کہنا تھا کہ وہ سمجھتے ہیں اس مقصد کا حصول ممکن ہے۔

لیکن اس وقت یکطرفہ عسکری کارروائیوں کے ذریعے اقوام متحدہ کی اہمیت کو جان بوجھ کر کمزور کیا جا رہا ہے۔ جمہوریہ کانگو، سوڈان اور دیگر جگہوں پر جاری جنگیں اس کی نمایاں مثال ہیں۔

انہوں نے کہا، رکن ممالک کی ذمہ داری ہے کہ وہ فلسطینیوں کے حق خود ارادیت کو یقینی بنائیں اور اس کا تحفظ کریں۔

(جاری ہے)

عالمی برادری میں اس بات پر اتفاق رائے بڑھ رہا ہے کہ اسرائیل غزہ میں نسل کشی کا مرتکب ہو رہا ہے۔

جنوبی افریقہ بین الاقوامی عدالت انصاف سے مطالبہ کر رہا ہے کہ وہ یہ فیصلہ دے کہ غزہ میں واقعی نسل کشی ہو رہی ہے اور اسے فوراً بند ہونا چاہیے۔"

رکن ممالک کو اس بات کا اعادہ کرنا ہوگا کہ آزادی ناقابل تقسیم ہے، اور ایک شخص کے حقوق کی نفی سبھی کی آزادی کو کمزور کرتی ہے۔

ترقی اور افریقہ

راما فوسا کا کہنا تھا کہ جنوبی افریقہ کی گروپ آف 20 کی صدارت براعظم افریقہ سے اس فورم کی پہلی سربراہی ہے جہاں ان ممالک کی کانفرنس میں قدرتی آفات کے خلاف مزاحمت، کم آمدنی والے ممالک کو پائیدار قرض کی فراہمی، ماحول دوست توانائی کی جانب منتقلی کے لیے مالی معاونت اور جامع وپائیدار ترقی کے لیے اہم معدنیات سے کام لینے پر بات چیت ہو گی۔

انہوں نے کہا کہ افریقہ لازوال عروج کی جانب گامزن ہے لیکن مالی وسائل کی کمی کے باعث اسے پائیدار ترقی کے کئی اہداف کو حاصل کرنے میں مشکلات کا سامنا ہے۔ کئی ترقی پذیر ممالک صحت یا تعلیم کے بجائے قرض کی ادائیگیوں پر زیادہ خرچ کرتے ہیں۔

جنوبی افریقہ کے صدر نے ترقی کے لیے داخلی وسائل سے کام لینے کی غرض سے تجارت کو اہم ترین ذریعہ قرار دیتے ہوئے کہا کہ اب اسے کئی ممالک کے خلاف ہتھیار کے طور پر استعمال کیا جانے لگا ہے۔ انہوں نے زور دیا کہ کیوبا کے خلاف اقتصادی پابندیاں جلد از جلد ختم کی جانا چاہئیں۔