Live Updates

نویں الزارونی سٹوڈنٹس اولمپک گیمز کے مقابلے 28ستمبر تک جار ی رہیں گے

جمعرات 25 ستمبر 2025 01:00

کراچی (اُردو پوائنٹ اخبارتازہ ترین - این این آئی۔ 25 ستمبر2025ء)پاکستان سٹوڈنٹس اولمپک ایسوسی ایشن کے زیراہتمام نویں الزارونی سٹوڈنٹس اولمپک گیمز کے مقابلے کراچی میں جاری ہیں،یہ مقابلے 28 ستمبر تک جاری رہیں گے۔ پاکستان سٹوڈنٹس اولمپک ایسوسی ایشن کے صدر مقبول آرائیں نے بتایا کہ گیمز کراچی کے تین مختلف مقامات پر ہو رہی ہیں جن میں پی ایس بی کوچنگ سنٹر کراچی، کے ایم سی سپورٹس کمپلیکس، کشمیر روڈ، کراچی اور منی سپورٹس کمپلیکس، ناظم آباد، کراچی کے مقامات شامل ہیں۔

(جاری ہے)

گیمز میں ملک بھر سے ڈیرھ سو سے زائد سکولوں، کالجز اور یونیورسٹیز کے طلباء و طالبات مختلف 24 کھیلوں کے مقابلوں میں حصہ لے رہے ہیں۔ تفصیلات کے مطابق فٹ سال، کرکٹ /ٹائپ بال اور تھروبال کے مقابلے جاری ہیں۔ باسکٹ بال اور والی بال کے مقابلے 26 سے 28 ستمبر تک کھیلے جائیں گے، پکل بال کے مقابلے 27 اور 28 ستمبر کو، بیڈمنٹن، ٹیبل ٹینس، تائیکوانڈو، پیڈل، ڈوج بال، فٹنس اور شطرنج کے مقابلے 27 ستمبر کو جبکہ آرچری، سکیٹنگ اور سائیکلنگ کے مقابلے 28 ستمبر کو کھیلے جائیں گے۔ گیمز کی اختتامی تقریب 28 ستمبر کو ہوگی۔ جس میں کامیابی حاصل کرنے والی ٹیموں کے کھلاڑیوں میں ٹرافیاں، میڈلز اور اسناد تقسیم کی جائیں گی۔