Live Updates

پاکستان کا ایشیا کپ کے فائنل میں پہنچنے کا راستہ بالکل سیدھا ہوگیا

پوائنٹس ٹیبل پر بھارت 4 پوائنٹس کے ساتھ پہلے، پاکستان اور بنگلادیش 2،2 پوائنٹس کے ساتھ دوسری اور تیسری پوزیشن پر ہیں

ذیشان مہتاب جمعرات 25 ستمبر 2025 10:35

پاکستان کا ایشیا کپ کے فائنل میں پہنچنے کا راستہ بالکل سیدھا ہوگیا

لاہور (اردو پوائنٹ تازہ ترین اخبار ۔ 25 ستمبر 2025ء ) ایشیا کپ میں بنگلادیش کو شکست دے کر بھارت کے فائنل کے لیے کوالیفائی کرنے کے بعد اب فائنل میں پہنچنے کیلئے دوسری ٹیم کیلئے اگر مگر کی صورتحال ختم ہوگئی اور راستہ آسان اور واضح ہوگیا۔

ایشیا کپ ٹی ٹونٹی ٹورنامنٹ 2025ء کے سپر 4 مرحلے میں بھارت نے بنگلادیش کو 41 رنز سے شکست دے کر فائنل کیلئے کوالیفائی کرلیا۔

بھارت کے 169 رنز کے ہدف کے تعاقب میں بنگلادیش کی ٹیم آخری اوور میں 127 رنز بنا کر آؤٹ ہوگئی۔

اس جیت کے ساتھ بھارت ایشیا کپ کے فائنل میں پہنچ گیا اور سپر 4 میں مسلسل 2 میچز ہارنے والا سری لنکا فائنل کی دوڑ سے باہر ہوگیا۔

البتہ بھارت نےاپنا سپر 4 مرحلے کا آخری میچ جمعہ کو سری لنکا کے خلاف کھیلنا ہے ۔

(جاری ہے)

بھارت کے فائنل میں پہنچنے کی صورت میں اب فائنل میں پہنچنے والی دوسری ٹیم کا راستہ اگر مگر سے نکل کر بالکل سیدھا ہوگیا ہے۔

پوائنٹس ٹیبل پر بھارت 4 پوائنٹس کے ساتھ پہلے، پاکستان اور بنگلادیش 2،2 پوائنٹس کے ساتھ دوسری اور تیسری پوزیشن پر ہیں۔

اب صورتحال یہ ہے کہ آج سپر 4 مرحلے میں پاکستان اور بنگلادیش کے درمیان میچ ہوگا ، جیتنے والی ٹیم اتوار کو بھارت کے ساتھ فائنل کھیلے گی۔

شائقین امید کررہے ہیں پاکستان آج بروز جمعرات بنگلادیش کو شکست دے کر فائنل کیلئے کوالیفائی کرے اور پھر فائنل میں بھارت کو ہرا کر اپنی مسلسل 2 ہار کا بدلہ لے ۔