Live Updates

بارشوں اور سیلاب سے متاثرہ علاقوں میں مجموعی طور پر 51 گرڈ اور 588 فیڈرز متاثر ہوئے، 382 فیڈر مکمل اور 203 جزوی طور پر بحال کر دیئے گئے، پاور ڈویژن

جمعرات 25 ستمبر 2025 13:47

اسلام آباد (اُردو پوائنٹ اخبارتازہ ترین - اے پی پی۔ 25 ستمبر2025ء) بارشوں اور سیلاب سے متاثرہ علاقوں میں مجموعی طور پر 51 گرڈ اور 588 فیڈرز متاثر ہوئے، 382 فیڈر مکمل اور 203 جزوی طور پر بحال کر دیئے گئے ہیں۔ پاور ڈویژن کی جانب سے بجلی بحالی پر 25 ستمبر تک کی رپورٹ کے مطابق فیسکو کے زیر انتظام علاقوں میں 28 گرڈ اور 81 فیڈرز متاثر ہوئے، متاثرہ فیڈرز میں 68 مکمل اور 13 جزوی طور پر بحال کردئیے گئے ہیں، فیسکو کے 2165 متاثرہ صارفین کیلئے بجلی کی بحالی کا کام تقریباََ 27 سے 28 ستمبر تک مکمل کرنے کی توقع ہے، فیسکو کے زیر انتظام علاقے فیصل آباد ، چنیوٹ اور میاں والی میں بجلی بحالی کا کام مکمل کر لیا گیا ہے، لیسکو کے 67 متاثرہ فیڈرز میں سے 66 مکمل اور 1 جزوی طور پر بحال ہوچکے ہیں، لیسکو کے 441 متاثرہ صارفین کیلئے بجلی کی بحالی کا کام تقریباََ 26 ستمبر تک مکمل کرنے کی توقع ہے، لیسکو کے زیر انتظام علاقے لاہور، ننکانہ، شیخوپورہ اور اوکاڑہ میں بجلی کی بحالی کا کام مکمل کر لیا گیا ہے۔

(جاری ہے)

اسی طرح میپکو کے 181 متاثرہ فیڈرز میں سے 37 مکمل اور 141کو جزوی طور پر بحال کر لیا گیا ہے، میپکو کے زیر انتظام علاقوں میں پانی اترتے ہی متاثرہ فیڈرز کی مکمل بحالی کا کام شروع ہو جائے گا۔ گیپکوکے کے 11 گرڈز اور 103فیڈرزمتاثر ہوئے، متاثرہ فیڈرز میں سے 102 فیڈرز مکمل اور 1 جزوی طور پر بحال ہوچکے ہیں، گیپکو کے 22 متاثرہ صارفین کیلئے بجلی بحالی کا کام سیلاب کا پانی اترنے پر مکمل کر لیا جائے گا۔

پیسکو کے 88 فیڈرز مکمل اور 3 کو جزوی طور پر بحال کر دیا گیا ہے، پیسکو کے زیر انتظام علاقے سوات، صوابی اور ڈی آئی خان میں بجلی کی بحالی کا کام مکمل ہو چکا ہے۔ ٹیسکو کے علاقے شمالی وزیرستان اور خیبر کے 18 متاثرہ فیڈرز مکمل طور پر بحال کر دیئے گئے ہیں۔ مزید برآں ہیزیکو کے زیر انتظام علاقے مانسہرہ کے 3 متاثرہ فیڈر مکمل طور پر بحال جبکہ سیپکو کے زیر انتظام علاقے کے 44 متاثرہ فیڈر کو بھی عارضی طور پر بحال کر دیا گیا ہے۔