وفاقی وزیر قانون اعظم نذیر تارڑ سے وزیر اعلیٰ بلوچستان میر سرفراز بگٹی کی ملاقات

جمعہ 26 ستمبر 2025 00:20

اسلام آباد (اُردو پوائنٹ اخبارتازہ ترین - اے پی پی۔ 26 ستمبر2025ء) وزیر اعلیٰ بلوچستان میر سرفراز بگٹی سے وفاقی وزیر قانون اعظم نذیر تارڑ نے اسلام آباد میں ملاقات کی۔ترجمان وزارت قانون وانصاف کے مطابق ملاقات میں باہمی دلچسپی کے امور، قانونی معاملات اور وفاق و صوبے کے درمیان تعاون کو مزید فروغ دینے پر تفصیلی تبادلہ خیال کیا گیا۔ اس موقع پر وزیر اعلیٰ بلوچستان میر سرفراز بگٹی نے کہا کہ بلوچستان اسمبلی میں اتفاق رائے کے ساتھ موثر قانون سازی پر کام ہورہا ہے جس سے عوامی مسائل کے حل میں مدد ملے گی۔

(جاری ہے)

انہوں نے اس بات پر زور دیا کہ صوبے کے عوام کو انصاف تک بروقت اور آسان رسائی یقینی بنانا حکومت کی اولین ترجیح ہے۔ ملاقات میں بلوچستان میں قانونی اصلاحات کے عمل کو تیز کرنے اور انصاف کی فراہمی کے نظام کو مزید فعال بنانے پر بھی بات چیت ہوئی وفاقی وزیر قانون نے یقین دہانی کرائی کہ وفاقی حکومت بلوچستان کے عوام کو زیادہ سے زیادہ ریلیف فراہم کرنے کے لیے صوبائی حکومت کے ساتھ بھرپور تعاون جاری رکھے گی۔ وزیر اعلیٰ میر سرفراز بگٹی نے اس عزم کا اظہار کیا کہ صوبے میں انصاف کے نظام کو بہتر بنانے کے لیے وفاقی حکومت کے ساتھ مل کر عملی اقدامات کیے جائیں گے تاکہ عوامی توقعات پر پورا اترا جا سکے۔