Live Updates

بلاول بھٹو زرداری کا ضمنی بلدیاتی الیکشن میں کامیابی پر عوام سے اظہار تشکر

جمعرات 25 ستمبر 2025 20:06

کراچی (اُردو پوائنٹ اخبارتازہ ترین - این این آئی۔ 25 ستمبر2025ء)پاکستان پیپلز پارٹی کے چیئرمین بلاول بھٹو زرداری نے ضمنی بلدیاتی الیکشن میں اپنی جماعت کی شاندار کامیابی پر عوام سے تشکر کا اظہار کرتے ہوئے نومنتخب بلدیاتی نمائندوں کو مبارکباد اور جیالوں کو اس فتح کو یقینی بنانے کے لیے دن رات محنت پر خراجِ تحسین پیش کیا ہے۔ میڈیا سیل بلاول ہاوس سے جاری کردہ پریس رلیز کے مطابق، پی پی پی چیئرمین نے سندھ میں ضمنی بلدیاتی انتخابات کے نتائج پر اپنے ردعمل میں کہا کہ کراچی سے کشمور تک، عوام نے ایک بار پھر ووٹ کے ذریعے پیپلز پارٹی پر اپنے غیر متزلزل اعتماد کا اظہار کیا ہے۔

انہوں نے کہا کہ یہ کامیابی قائدِ عوام شہید ذوالفقار علی اور شہید محترمہ بینظیر بھٹو کی جماعت سے عوام کے گہرے رشتے کا ثبوت ہے۔

(جاری ہے)

چیئرمین بلاول بھٹو زرداری کا کہنا تھا کہ ضمنی انتخابات میں عوام کی بھرپور حمایت سے پاکستان پیپلز پارٹی کیا عزم اور بھی مضبوط ہوا ہے، اور ہم مزید جوش و خلوص کے ساتھ عوام کی خدمت کریں گے۔ انہوں نے کہا کہ پاکستان پیپلز پارٹی کو دیا گیا ہر ووٹ دراصل جمہوریت، عام آدمی کے حقوق کے تحفظ اور ایک ترقی پسند و خوشحال پاکستان کے وژن کے حق میں ڈالا گیا ووٹ ہے۔

انہوں نے اس عزم کا اعادہ کیا کہ پاستان پیپلز پارٹی بلدیاتی اداروں کے استحکام اور ہر محلے، ہر گاں اور ہر شہر کی ترقی کے لیے جدوجہد جاری رکھے گی۔ چیئرمین بلاول بھٹو زرداری کا کہنا تھا کہ سندھ میں مستحکم بلدیاتی نظام نچلی سطح تک وسائل و اختیارات کی منصفانہ تقسیم کا مضبوط مکینزم اور پائیدار ترقی کی ضمانت ہے۔ انہوں نے کہا کہ سندھ کے بلدیاتی ادارے اور پاکستان پیپلز پارٹی کا بلدیاتی نظام کے متعلق ویژن دیگر جماعتوں اور انکی حکومتوں کے لیے ایک قابل تقلید مثال ہے۔

انہوں نے نشاندھی کرتے ہوئے کہا کہ ملک کے سب سے بڑی آبادی والے صوبہ پنجاب کے عوام طویل عرصے سے بلدیاتی نظام اور اس کے ممکنہ ثمرات سے محروم ہیں۔ انہوں نے کہا کہ آج اگر پنجاب میں منتخب بلدیاتی ادارے فعال ہوتے تو سیلاب متاثرین کی بلا امتیاز امداد میں رکاوٹیں حائل نہ ہوتیں۔ چیئرمین پیپلز پارٹی نے تمام جماعتوں اور شہریوں کو اپیل کرتے ہوئے زور دیا کہ آئیے ہم سب مِل کر ایک ایسا پاکستان تعمیر کریں جہاں جمہوریت پھلے پھولے اور ہر شہری عزت و وقار کے ساتھ زندگی گزارے۔