مسافر کے انتقال پر فلائٹ کی ہنگامی لینڈنگ‘ بچی کی طبیعت خرابی پر دوسری پرواز بھی لیٹ ہوگئی

میڈیکل ایمرجنسی ٹیم نے مسافر کو فوری طبی امداد فراہم کرنے کی کوشش کی تاہم مسافر کا پہلے ہی انتقال ہو چکا تھا

ساجد علی ہفتہ 27 ستمبر 2025 13:25

مسافر کے انتقال پر فلائٹ کی ہنگامی لینڈنگ‘ بچی کی طبیعت خرابی پر دوسری ..

کراچی ( اُردو پوائنٹ اخبارتازہ ترین۔ 27 ستمبر2025ء ) دوران پرواز مسافر کے انتقال پر ایک فلائٹ کو ہنگامی لینڈنگ کرنا پڑی جب کہ بچی کی طبیعت خرابی پر دوسری پرواز بھی تاخیر کا شکار ہوگئی۔ میڈیا رپورٹس کے مطابق فیصل آباد سے دبئی کی غیرملکی ایئرلائن کی پرواز میں ایک مسافر کے انتقال کرنے پر جہاز نے کراچی میں ایمرجنسی لینڈنگ کی جہاں مجموعی طور پر 2 مسافروں کی طبیعت خراب ہونے پر ایک پرواز نے ہنگامی لینڈنگ کی گئی اور دوسری کو روک لیا گیا۔

ایئرپورٹ حکام کا کہنا ہے کہ فیصل آباد سے دبئی کی پرواز نے مسافر کی طبیعت خرابی پر کراچی میں ایمرجنسی لینڈنگ کی، یہ پرواز جب لاڑکانہ کے قریب پہنچی تو پائلٹ نے اے ٹی سی کراچی کو ہنگامی صورتحال سے آگاہ کیا اور مسافر کے بے ہوش ہونے پر پائلٹ نے پرواز کا رخ کراچی کی طرف موڑ دیا اور پرواز نے ہنگامی لینڈنگ کی، میڈیکل ایمرجنسی ٹیم نے لینڈ کرتے ہی مسافر کو فوری طبی امداد فراہم کرنے کی کوشش کی تاہم مسافر ذوالفقار کا پہلے ہی انتقال ہو چکا تھا۔

(جاری ہے)

علاوہ ازیں ایک اور پرواز میں بھی ہنگامی صورتحال پیدا ہوئی جو کراچی سے دبئی جارہی تھی تاہم اس پرواز میں سوار 3 سالہ بچی کی طبیعت انتہائی خراب ہوگئی، اس دوران شدید بخار میں مبتلا بچی بے ہوش ہوگئی جس پر عملے نے فوری طور پر میڈیکل ایمرجنسی ٹیم کو آگاہ کیا، جس کے بعد بچی زہرہ کو شدید بخار سے حالت انتہائی خراب ہونے پر نجی ہسپتال منتقل کردیا گیا۔