نوجوان ڈاکٹرز قوم کا قیمتی سرمایہ اور روشن مستقبل ہیں ،وفاقی وزیر قانون اعظم نذیر تارڑ کا کالج آف فزیشنز اینڈ سرجنز پاکستان کے کانووکیشن سے خطاب

لاہور (اُردو پوائنٹ اخبارتازہ ترین - اے پی پی۔ 27 ستمبر2025ء) وفاقی وزیر قانون و انصاف سینیٹر اعظم نذیر تارڑ نے کہا ہے کہ نوجوان ڈاکٹرز ملک و قوم کا قیمتی سرمایہ اور ہمارا روشن مستقبل ہیں، میڈیکل کے شعبے سے وابستہ افراد ہر روز ایک نئے امتحان اور چیلنج کا سامنا کرتے ہیں لیکن اپنی محنت، عزم اور لگن کے ذریعے وہ نہ صرف انسانی جانیں بچاتے ہیں بلکہ ملک و قوم کی خدمت کا بھی مقدس فریضہ سرانجام دے رہے ہیں۔

ان خیالات کا اظہار انہوں نے ہفتہ کے روز یہاں مقامی ہوٹل میں کالج آف فزیشنز اینڈ سرجنز پاکستان کے 58ویں کانووکیشن کی تقریب سے خطاب کرتے ہوئے کیا۔ تقریب میں بڑی تعداد میں فارغ التحصیل ڈاکٹرز، ان کے والدین، فیکلٹی ممبران، طبی ماہرین اور دیگر معزز مہمان شریک ہوئے۔

(جاری ہے)

اس موقع پر صوبائی وزرائے صحت پنجاب خواجہ سلمان رفیق، خواجہ عمران نذیر، سی پی ایس پی کے صدر پروفیسر خالد مسعود گوندل، پروفیسر ڈاکٹر راشد لطیف، پروفیسر فرید ظفر سمیت دیگر نمایاں شخصیات بھی موجود تھیں۔

وفاقی وزیر سینیٹر اعظم نذیر تارڑ نے اپنے خطاب میں سی پی ایس پی کی خدمات کو سراہتے ہوئے کہا کہ کالج آف فزیشنز اینڈ سرجنز پاکستان کا معیار کسی بھی بین الاقوامی ادارے سے کم نہیں ہے۔ اس ادارے کے فارغ التحصیل ڈاکٹرز دنیا بھر میں پاکستان کا نام روشن کر رہے ہیں اور ان کی خدمات طب کی دنیا میں ناقابل فراموش ہیں،جو اس ادارے کی کامیابی کا منہ بولتا ثبوت ہے۔

اپنے خطاب میں اعظم نذیر تارڑ نے پاکستان کی تاریخی کامیابیوں کا بھی ذکر کیا۔ انہوں نے کہا کہ 10 مئی پاکستان کی تاریخ میں ہمیشہ ایک روشن دن کے طور پر یاد رکھا جائے گا۔ پاکستان نے اپنے سے بڑے ملک کو ایسا سبق سکھایا کہ وہ مدتوں یاد رکھے گا۔ پوری دنیا میں پاکستان کو بے پناہ عزت ملی اور پوری قوم دشمن کے خلاف سیسہ پلائی ہوئی دیوار ثابت ہوئی۔

انہوں نے مزید کہا کہ اللہ تعالی نے پاکستان کو حرمین شریفین کی خدمت کا جو عظیم شرف عطا کیا ہے، اس سے پوری پاکستانی قوم کا سر فخر سے بلند ہو گیا ہے۔ وفاقی وزیر نے کہاکہ دفاع میں اتنی عظیم کامیابی کے بعد اب ضرورت اس امر کی ہے کہ ملک کی ترقی و خوشحالی کے لیے ہر شخص اپنا کردار ادا کرے، ہم سب کو مل کر پاکستان کو ترقی کی بلندیوں تک پہنچانا ہے اور اس میں طبی شعبہ ایک کلیدی کردار ادا کر سکتا ہے۔

اعظم نذیر تارڑ نے کہا کہ حکومت طب کے شعبے کی ترقی کے لیے بھرپور کوشش کر رہی ہے۔ وزیر اعظم محمد شہباز شریف کی ہدایت پر اسلام آباد میں جناح میڈیکل انسٹی ٹیوٹ قائم کیا جا رہا ہے، جو ملک کے میڈیکل سیکٹر میں ایک اہم سنگ میل ثابت ہوگا۔ اس کے ساتھ ساتھ وفاقی حکومت صوبوں کے ساتھ مشاورت کے بعد ایک سو ارب روپے کی لاگت سے ہیپاٹائٹس کے خاتمے کے لیے جامع منصوبہ شروع کرنے جا رہی ہے۔

انہوں نے کہا کہ یہ منصوبے نہ صرف صحت کی سہولیات کو بہتر بنائیں گے بلکہ لاکھوں لوگوں کی جانیں بھی بچائیں گے۔ انہوں نے کہاکہ صحت کا شعبہ انسانی خدمت کا سب سے بڑا میدان ہے۔ اس میں کام کرنے والے ہر فرد کو نہ صرف دعائیں ملتی ہیں بلکہ وہ اپنی پیشہ ورانہ کامیابی کے ساتھ ساتھ ملک و قوم کی ترقی میں بھی اہم کردار ادا کرتے ہیں۔کانووکیشن میں دیگر مقررین نے بھی اپنے خیالات کا اظہار کیا۔

صوبائی وزیر صحت خواجہ سلمان رفیق نے کہا کہ پنجاب حکومت طبی تعلیم اور صحت کی سہولیات کو مزید بہتر بنانے کے لیے پرعزم ہے۔ نوجوان ڈاکٹرز کو جدید ٹیکنالوجی اور تربیت فراہم کر کے ہم ملک کو صحت مند بنانا چاہتے ہیں۔ خواجہ عمران نذیر نے اپنے خطاب میں کہا کہ سی پی ایس پی جیسے ادارے ہمارے لیے فخر کا باعث ہیں، اور ہم صوبائی سطح پر ایسے اداروں کی مدد جاری رکھیں گے۔

پروفیسر ڈاکٹر راشد لطیف نے نوجوان ڈاکٹرز کو مشورہ دیا کہ طب ایک مسلسل سیکھنے کا عمل ہے، ہمیشہ نئی تحقیق اور مریضوں کی خدمت کو ترجیح دیں۔تقریب کے اختتام پر اعلی کارکردگی کا مظاہرہ کرنے والے فارغ التحصیل ڈاکٹرز کو میڈلز، اسناد اور خصوصی ایوارڈز سے نوازا گیا۔فارغ التحصیل ڈاکٹرز نے اے پی پی سے گفتگو کرتے ہوئے کہا کہ یہ دن ان کی زندگی کا یادگار لمحہ ہے، اور وہ ملک کی خدمت کے لیے تیار ہیں۔