Live Updates

پاکستان تحریک انصاف کے پشاور میں پاور شو کی تیاریاں مکمل، کارکنوں کی آمد جاری

وزیراعلیٰ خیبر پختونخواہ علی امین گنڈاپور، سلمان اکرم راجہ، اسد قیصر، پارٹی چیئرمین بیرسٹر گوہر و دیگر رہنماء خطاب کریں گے، عمران خان کی بہنیں علیمہ خان اور عظمیٰ خان بھی جلسے میں شریک ہوں گی

ساجد علی ہفتہ 27 ستمبر 2025 16:17

پاکستان تحریک انصاف کے پشاور میں پاور شو کی تیاریاں مکمل، کارکنوں ..

پشاور ( اُردو پوائنٹ اخبارتازہ ترین۔ 27 ستمبر2025ء ) پاکستان تحریک انصاف کے پشاور میں پاور شو کی تیاریاں مکمل کرلی گئیں جہاں کارکنوں کی آمد کا سلسلہ جاری ہے۔ تفصیلات کے مطابق پاکستان تحریک انصاف آج پشاور کے رنگ روڈ پر جلسہ کررہی ہے جہاں جلسہ گاہ میں سٹیج اور کرسیاں لگا دی گئی ہیں، خیبر پختونخواہ کے مختلف اضلاع سمیت ملک بھر سے کارکنوں کی آمد جاری ہے، جلسہ گام میں وزیراعلیٰ خیبر پختونخواہ علی امین گنڈاپور، سلمان اکرم راجہ، اسد قیصر، پارٹی چیئرمین بیرسٹر گوہر اور دیگر رہنما شرکاء سے خطاب کریں گے، عمران خان کی بہنیں علیمہ خان اور عظمیٰ خان بھی جلسے میں شریک ہوں گی۔

انتظامیہ کا کہنا ہے کہ جلسے کے لیے سکیورٹی کے فول پروف انتظامات مکمل کر لیے گئے ہیں، پی ٹی آئی رہنماء مینا خان آفریدی کا کہنا ہے کہ یہ ایک تاریخی اجتماع ہوگا جس میں 5 لاکھ سے زائد افراد شریک ہوں گے، یہ جلسہ عمران خان کی کال پر ہو رہا ہے اور ان کی کال پر پورا پاکستان نکلتا ہے، وفاقی حکومت کے خاتمے کے بعد عمران خان نے اسی مقام پر جلسہ کیا تھا جو بہت بڑا تھا اور آج کا جلسہ بھی اسی طرح تاریخی ثابت ہوگا۔

(جاری ہے)

بتایا گیا ہے کہ خیبر پختونخواہ میں پی ٹی آئی کی حکومت ہونے کی وجہ سے جلسے کی تیاریوں میں کسی قسم کی رکاوٹ یا مشکل درپیش نہیں جہاں مختلف گاڑیاں جلسہ گاہ کی صفائی کے لیے استعمال کی جا رہی ہیں، اس حوالے سے مینا خان آفریدی نے بتایا کہ جلسے کی سکیورٹی پولیس کی ذمہ داری ہے تاہم دیگر انتظامات پارٹی خود کر رہی ہے، جلسہ پارٹی کے اخراجات پر منعقد ہو رہا ہے اور کارکنان چندہ جمع کرکے اس میں شرکت کیلئے پہنچ رہے ہیں۔