آئی ٹی سیکٹر کے لیے حکومت کا بڑا اقدام، 8.6 ارب روپے کے فنڈز جاری

ہفتہ 27 ستمبر 2025 20:43

اسلام آباد (اُردو پوائنٹ اخبارتازہ ترین - آن لائن۔ 27 ستمبر2025ء) وفاقی حکومت نے وزارت آئی ٹی و ٹیلی کام کے ترقیاتی منصوبوں کے لیے رواں مالی سال کی پہلی سہ ماہی میں 8.6 ارب روپے جاری کر دیے ہیں۔ یہ فنڈز پبلک سیکٹر ڈیولپمنٹ پروگرام (پی ایس ڈی پی) کے تحت جاری کیے گئے، جس میں حکومت نے رواں مالی سال کے لیے مجموعی طور پر 31 ارب روپے مختص کیے تھے۔

دستیاب سرکاری دستاویزات کے مطابق جاری کیے گئے فنڈز ترقیاتی منصوبوں پر مکمل طور پر خرچ ہو چکے ہیں، جن میں سب سے نمایاں اسلام آباد اور کراچی میں قائم کیے جانے والے جدید آئی ٹی پارکس کے منصوبے شامل ہیں۔اسلام آباد آئی ٹی پارک کے لیے 7 ارب روپے جبکہ کراچی آئی ٹی پارک کے لیے 15 ارب روپے مختص کیے گئے ہیں۔ ان دونوں منصوبوں کی تکمیل کورین بینک کے تعاون سے دیے گئے نرم قرضوں کے تحت کی جا رہی ہے۔

(جاری ہے)

وزارت آئی ٹی کی جانب سے جاری کردہ تفصیلات کے مطابق اسلام آباد آئی ٹی پارک کا 80 فیصد تعمیراتی کام مکمل ہو چکا ہے۔ یہ پارک جدت، تحقیق، اور ٹیکنالوجی سروسز کا مرکز ہوگا، جس سے آئی ٹی ایکسپورٹس میں نمایاں اضافہ متوقع ہے۔آئی ٹی پارک کے قیام سے نہ صرف پاکستان کے ڈیجیٹل انفراسٹرکچر کو تقویت ملے گی بلکہ مقامی اسٹارٹ اپس اور نوجوان کاروباری افراد کے لیے بھی نئے مواقع پیدا ہوں گے۔

ادھر کراچی آئی ٹی پارک منصوبہ اس وقت نظرثانی شدہ پلاننگ کے مراحل میں ہے اور جلد اس پر عملی پیشرفت متوقع ہے۔ ترجمان وزارت آئی ٹی کے مطابق حکومت ملک میں ٹیکنالوجی کے فروغ اور آئی ٹی سیکٹر کی استعداد بڑھانے کے لیے پٴْرعزم ہے تاکہ پاکستان ڈیجیٹل معیشت کی دوڑ میں مؤثر انداز میں شریک ہو سکے۔