پنجاب میں موسمی حالات، فضائی آلودگی کی پیشگوئی کرنے والا جدید فورکاسٹ سسٹم تیار کرلیا گیا

جدید ترین ٹیکنالوجی سے لیس پاکستان کا یہ پہلا ایئر کوالٹی فورکاسٹ سسٹم ہے، خود کار نظام فضائی آلودگی کی مقدار ماپے گا، فصل کی باقیات جلانے پر کریک ڈاؤن بھی اس نظام کا حصہ ہے، سینئروزیر مریم اورنگزیب

ثنااللہ ناگرہ ہفتہ 27 ستمبر 2025 19:05

پنجاب میں موسمی حالات، فضائی آلودگی کی پیشگوئی کرنے والا جدید فورکاسٹ ..

لاہور( اردوپوائنٹ اخبار تازہ ترین۔ آئی پی اے۔ 27 ستمبر 2025ء ) وزیراعلی مریم نواز شریف کی ہدایت پر پنجاب میں پاکستان کا جدید ترین ٹیکنالوجی سے لیس پہلا ایئرکوالٹی فورکاسٹ سسٹم تیار کر لیا گیا، جدید ترین نظام پنجاب بھر میں موسمی حالات اور فضائی آلودگی کی پیشگوئی کرے گا -لاہور، فیصل آباد سمیت پنجاب کے بڑے شہروں میں آلودگی کم کرنے میں مدد ملے گی، فضائی آلودگی سے متعلق ہفتہ وار رپورٹ جاری ہوگی -سینئر صوبائی وزیر مریم اورنگزیب نے کہاکہ ایئر فورکاسٹنگ سسٹم ریئل ٹائم مانیٹرنگ اور جدید سائنسی ماڈلز کا امتزاج ہے-جدید نظام''ونڈی'', ''یورو'' جیسے انٹرنیشنل ماڈلز، عالمی فضائی انڈیکس اور مقامی ضروریات کے مطابق کام کرتا ہے۔

سینئر صوبائی وزیر مریم اورنگزیب نے کہاکہ ائیر کوالٹی فورکاسٹنگ سسٹم میں رواں سال لگائے گئے جدید مانیٹرنگ اسٹیشنز کا ڈیٹا بھی شامل ہوگا- پنجاب میں 41 جدید ایئر کوالٹی مانیٹرنگ اسٹیشنز لگائے جا چکے ہیں - آئندہ دنوں میں ان سٹیشنز کی تعداد سو (100) تک بڑھائیں گے۔

(جاری ہے)

جدید نظام شہریوں کو صحت کی حفاظتی اور احتیاطی تدابیر بھی بتائے گا - خود کار نظام فضائی آلودگی کی مقدار ناپے گا اور موسمی حالات کی تبدیلی کا ریکارڈ مرتب کرے گا- وزیراعلی مریم نواز شریف کے وژن کی بدولت یہ جدید نظام سائنسی بنیادوں پر مبنی پالیسی سازی میں مددگار کرے گا-وزیر ماحولیات مریم اورنگزیب نے سیکریٹری ماحولیات سلوت سعید، ڈی جی ماحولیات عمران حامد شیخ اور ای پی اے ٹیم کو ایئر فورکاسٹنگ ماڈل کی تیاری پر سراہا-مریم اورنگزیب نے کہاکہ یہ نظام پنجاب میں سموگ کے خاتمے کے حکومتی پلان کا حصہ ہے۔

فصلوں کی باقیات جلانے پر کریک ڈاؤن بھی اس نظام کا حصہ ہے- سینئر صوبائی وزیر مریم اورنگزیب نے کہا کہ جدید آلات کے ذریعے فضائی آلودگی کی سطح، موسمی حالات اور شہری علاقوں کی ہوا کے معیار کی مسلسل نگرانی کی جائے گی- گاڑیوں اور صنعتی دھوئیں پر قابو پانے کے اقدامات جاری ہیں ۔ ماحولیاتی آلودگی پر قابو پانے کے لیے ہر شہری کو کردار ادا کرنا ہوگا- شہری سموگ سیزن کے دوران غیر ضروری گھروں سے نہ نکلیں -سینئر صوبائی وزیر مریم اورنگزیب نے اپیل کی کہ سموگ کے دوران بزرگ، بچے اور سانس کے مریض خصوصی احتیاط کریں۔