م*ڈاکٹر عثمان انور کا پولیس شہدا کے اہل خانہ کیلئے اپنی چھت کی فراہمی کا مشن جاری

ٴآئی جی پنجاب نے فرض کی راہ میں جان قربان کرنے والے ایک اور پولیس اہلکار کی فیملی کو گھر دے دیا

اتوار 28 ستمبر 2025 20:30

l لاہور (اُردو پوائنٹ اخبارتازہ ترین - آن لائن۔ 28 ستمبر2025ء) انسپکٹر جنرل پولیس پنجاب ڈاکٹر عثمان انور کا پولیس شہدا کے اہل خانہ کے لئے اپنی چھت کی فراہمی کا مشن جاری ہے، جس کے تسلسل میں آئی جی پنجاب نے فرض کی راہ میں جان قربان کرنے والے ایک اور پولیس اہلکار کی فیملی کو گھر دے دیا۔ تفصیلات سے آگاہ کرتے ہوئے ترجمان پنجاب پولیس نے بتایا کہ شہید کانسٹیبل ضیاء اختر کے اہلخانہ کو 01 کروڑ 35 لاکھ روپے مالیت کا گھر دے دیا گیا۔

شہید کے اہلخانہ کو انکی پسند کے مطابق خوشاب کے علاقہ جوہر آباد میں گھر خرید کر فراہم کیا گیا۔ ترجمان پنجاب پولیس نے مزید بتایا کہ کانسٹیبل ضیاء اختر نے رواں سال تھانہ قائد آباد کی حدود میں خطرناک ڈکیت و منشیات فروش گینگ سے مقابلے کے دوران جام شہادت نوش کیا۔

(جاری ہے)

شہید کانسٹیبل ضیاء اختر کے لواحقین میں اہلیہ، 2 بیٹے اور ایک بیٹی شامل ہیں۔

آئی جی پنجاب ڈاکٹر عثمان انور کی خصوصی کاوش پر حکومت پنجاب نے شہید کے اہلخانہ کے گھر کیلئے فنڈز جاری کئے۔ آئی جی پنجاب ڈاکٹر عثمان انور نے کانسٹیبل ضیاء اختر کی لازوال قربانی کو بھرپور خراج تحسین پیش کرتے ہوئے کہا کہ کانسٹیبل ضیاء اختر نے اپنی جان کی پرواہ کئے بغیر فرائض کی ادائیگی کے دوران جام شہادت نوش کیا۔ آئی جی پنجاب نے مزید کہا کہ پنجاب پولیس اپنے بہادر فرزند کی لازوال قربانی کو کبھی فراموش نہیں کرے گی۔ پنجاب پولیس شہید کانسٹیبل ضیاء اختر جیسے 1700 سے زائد شہداء کی امین فورس ہے۔