کراچی صوبے کا نعرہ پنجابی اشرافیہ کا ہے، ہمارا نہیں،آفاق احمد

ہم مہاجر قوم کو تقسیم ہونے دیں گے نہ مہاجر قوم کی وراثت نہ اب اپنی قوم کو تقسیم ہونے دیں گے اور نہ ہی اپنی قوم کی زمینوں کو تقسیم ہونے دیں گے چاہے اسکے لئے کچھ بھی قیمت ادا کرنی پڑے،چیئرمین مہاجرقومی موومنٹ

اتوار 28 ستمبر 2025 20:50

کراچی(اُردو پوائنٹ اخبارتازہ ترین - این این آئی۔ 28 ستمبر2025ء) مہاجرقومی موومنٹ(پاکستان) کے چیئرمین آفاق احمد نے کہاہے کہ کراچی صوبے کا نعرہ پنجابی اشرافیہ کا ہے، ہمارا نہیں،ہم مہاجر قوم کو تقسیم ہونے دیں گے نہ مہاجر قوم کی وراثت،نہ اب اپنی قوم کو تقسیم ہونے دیں گے اور نہ ہی اپنی قوم کی زمینوں کو تقسیم ہونے دیں گے چاہے اسکے لئے کچھ بھی قیمت ادا کرنی پڑے۔

یہ بات مہاجر قومی موومنٹ (پاکستان)کے چیئرمین آفاق احمد نے شہر کے مختلف علاقوں سے آئے ہوئے مہاجر اکابرین سے خطاب کرتے ہوئے کہی۔آفاق احمد نے کہا کہ میری قوم پہلی بار پاکستان بناکر تقسیم ہوئی جب دس کروڑ مسلمانوں کیلئے علیحدہ وطن کا فریبی نعرہ دینے والوں نے پاکستان بن جانے کے فورا بعد ہندوستان کے اقلیتی علاقوں کے مسلمانوں سے غداری کی اور انہیں ہندوستان کا وفادار بن کر وہیں رہنے کا مشورہ دیا۔

(جاری ہے)

دوسری بار میری قوم پاکستان بچانے کی جدوجہد کرکے مشرقی پاکستان میں تقسیم ہوگئی، ہتھیارڈالنے والے واپس آگئے گردنیں کٹانے والوں کی نسلیں آج بھی پاکستانی جھنڈا لگائے ریڈ کراس کیمپوں میں پڑی ہیں، کراچی صوبے کا نعرہ لگا کر اب تیسری بارمیری قوم کو تقسیم کرنے کی سازش کی جارہی ہے جو کسی صورت کامیاب نہیں ہونے دیں گے۔ آفاق احمد نے کہا کہ مہاجر قوم ٹنڈو جام، ٹنڈوآدم، ٹنڈو الہ یار، میرپور خاص، نوابشاہ، شہدادپور، شاہ پور چاکر، خیر پور، سکھر میں آباد ہے، کراچی صوبے کا نعرہ لگاکر انکے مستقبل سے کھیلنے کی اجازت کسی کو نہیں دیں گے۔

آفاق احمد نے کہا کہ سندھ کے شہری علاقوں میں میری قوم آباد ہے اور وہی شہری سندھ کے وارث ہیں، قوم تقسیم ہوگی نہ قوم کی وراثت،مہاجر قوم کے مستقبل کے فیصلے مہاجر خود کریں گے۔آفاق احمد نے کہا کہ بزرگ میری قوم کی دانش ہیں تو نوجوان طاقت!قوم کا ہر فرد بقا کی جدوجہد میں اپنا حصہ ڈال رہا ہے، میں یقین دلاتا ہوں کہ آنے والی نسلوں کو محفوظ مستقبل دے کر جائیں گے۔ آفاق احمد نے زور دیتے ہوئے پھر کہا کہ مہاجر قوم اپنی جائیداد کا ایک انچ فروخت نہ کریں، یہ آنے والی نسلوں کی امانت ہے۔