Live Updates

ہمارے بورڈ کو ریلوکٹے چاہئیں، تگڑے کھلاڑی نہیں : شعیب اختر

اب ہمیں ایسے نوجوان کرکٹرز چاہیے جو ہاں میں ہاں ملائیں، جسکی خود ٹیم میں جگہ نہیں بن رہی وہ کیا سٹار بنائے گا : سابق سپیڈ سٹار

ذیشان مہتاب منگل 30 ستمبر 2025 11:55

ہمارے بورڈ کو ریلوکٹے چاہئیں، تگڑے کھلاڑی نہیں : شعیب اختر

لاہور (اردو پوائنٹ تازہ ترین اخبار ۔ 30 ستمبر 2025ء ) سابق سپیڈ سٹار شعیب اختر کا کہنا ہے کہ بدقسمتی سے ہمارے بورڈ کو ایسے ہی ریلو کٹے چاہیے، تگڑے کھلاڑی نہیں۔

نجی ٹی وی کے پروگرام میں گفتگو کرتے ہوئے 50 سالہ سابق ٹیسٹ کرکٹر شعیب اختر نے کہا کہ ایشیا کپ میں ٹیم کا کمبی نیشن ٹھیک نہیں تھا، جب تک پکے آل راؤنڈر، پکے بولرز نہیں کھلائیں گے یہی صورتحال رہے گی۔

انہوں نے کہا کہ بھارت کا ٹاپ آرڈر آؤٹ ہوگیا مگر مڈل آرڈر نے پرفارم کیا، بابر اعظم اور رضوان کو پہلے نکالا اب بلانے پر بحث ہوتی رہے گی، ہمارے ہاں اسٹرائیک ریٹ کا مسئلہ 15 سال سے ہے۔

سابق کرکٹر نے کہا کہ ہمارا ڈومیسٹک اسٹرکچر تباہ و برباد ہوچکا ہے، ڈومیسٹک کرکٹ میں کوئی ڈائریکشن نہیں، گراس روٹ لیول نہیں، دوسرے ممالک نے کرکٹرز پر انویسٹ کیا ہے ،مینجمنٹ پر نہیں، 2022ء میں بھی یہی باتیں کررہے تھے آج پھر وہی باتیں کررہے ہیں۔

(جاری ہے)

شعیب اختر کا کہنا تھا کہ ایک وقت تھا ہم فاسٹ بولنگ کو انجوائے کرتے تھے، کبھی ہم نئے ٹیلنٹ کو انجوائے کرتے تھے جیت جاتے تھے، اب ہمیں ایسے نوجوان کرکٹرز چاہیے جو ہاں میں ہاں ملائیں، جس کی خود ٹیم میں جگہ نہیں بن رہی تو وہ کیا اسٹار بنائے گا۔

ایک سوال کے جواب میں سابق کرکٹر نے کہا کہ ریٹائرمنٹ کے بعد فیصلہ کیا تھا پی سی بی نہیں جاؤں گا کیونکہ بورڈ میں جو بھی جاتا ہے بدنام ہوکر ہی باہر آتا ہے۔

انہوں نے کہا کہ ڈپارٹمنٹ کرکٹ ختم کردی گئی، بنیادی کرکٹ ڈومیسٹک روک دی گئی، جب ہماری بنیادی ہی کرکٹ ہی نہیں ہوگی تو سٹار کرکٹرز کہاں سے آئیں گے، شاہین آفریدی کی لائن اس لیے نہیں کہ سیزن کھیلا نہیں ہے۔

شعیب اختر نے مزید کہا کہ محسن نقوی کے پاس اختیار ہے وہ بہت کچھ درست کرسکتے ہیں، پیسہ بھی اور موقع بھی ہے پورے سٹرکچر کو درست کردیں۔