کینیڈا نے بھارت کے لارنس بشنوئی گینگ کو دہشتگرد تنظیم قرار دیدیا

اس گینگ نے تشدد، دھمکیاں اور ٹارگٹ کلنگ کے ذریعے کینیڈا بھر میں بیرون ملک مقیم کمیونٹیز میں خوف پیدا کیا

منگل 30 ستمبر 2025 14:25

اوٹاوہ(اُردو پوائنٹ اخبارتازہ ترین - این این آئی۔ 30 ستمبر2025ء)کینیڈا کی حکومت نے بھارت کے لارنس بشنوئی گینگ کو دہشتگرد تنظیم قرار دے دیا۔گینگ کو جیل میں قید گینگسٹر لارنس بشنوئی چلارہا ہے ۔کشمیرمیڈیاسروس کے مطابق کینیڈین وزیر برائے پبلک سیفٹی گیری آنند سنگاری کا کہنا ہے کہ یہ اقدام عالمی سطح پر دہشتگردی کو روکنے کی کوششوں کا حصہ ہے۔

انہوں نے کہا کہ اس گینگ نے تشدد، دھمکیاں اور ٹارگٹ کلنگ کے ذریعے کینیڈا بھر میں بیرون ملک مقیم کمیونٹیز میں خوف پیدا کیا ہے۔ انہوں نے کہا کہ گروپ کودہشتگرد تنظیم قراردینے سے ہمیں ان کا مقابلہ کرنے اور ان کے جرائم کو روکنے کے لیے مکمل اختیار حاصل ہو گا۔ انہوں نے زور دیا کہ خوف پیدا کرنے کے لیے کمیونٹیز کو نشانہ بنانے والے تشدد اور دہشت گردی کی کینیڈا میں کوئی کوئی جگہ نہیں ہے۔

(جاری ہے)

دہشتگرد تنظیموں کی فہرست میں شامل کئے جانے کے بعد قانون نافذ کرنے والے ادارو ں کو بشنوئی گینگ کے اثاثے منجمد یا ضبط کرنے ، گروپ کے اراکین کے خلاف مقدمہ چلانے اور اس کی بین الاقوامی کارروائیاں روکنے کا اختیار مل گیاہے ۔غیر ملکی میڈیا کا کہنا ہے کہ بشنوئی گینگ پرخالصتان تحریک کے رہنما ہردیپ سنگھ نجر کے قتل کا الزام ہے، بشنوئی گینگ بھارتی سیاستدان بابا صدیق کے قتل میں بھی ملوث ہے اور اس کے علاوہ گینگ نے بھارتی اداکار سلمان خان کو قتل کی دھمکیاں بھی دیں۔

مقامی حکام کا کہنا ہے کہ اس سے قانون نافذ کرنے والے اداروں کو دہشتگردی سے متعلقہ جرائم جیسے کہ فنڈنگ، سفر اور بھرتی کو روکنے میں مدد ملے گی۔واضح رہے بشنوئی گینگ بنیادی طور پر ہندوستان سے کام کرتا ہے اور اس کا کینیڈا میں اثر و رسوخ ہے۔ یہ گروہ قتل، فائرنگ اور آتش زنی کا ارتکاب کرتا ہے،ور خوف و ہراس پھیلا کر کمیونٹیز کو دہشت زدہ کرتا ہے۔