Live Updates

ٹرافی واپس کریں : بی سی سی آئی ، بھارتی کپتان آکر مجھ سے وصول کرلے، محسن نقوی کا واضح جواب

دبئی میں ایشین کرکٹ کونسل کا اجلاس، سوریا کمار کے سیاسی بیانات اور ہاتھ نہ ملانے کے عمل کی مذمت

ذیشان مہتاب بدھ 1 اکتوبر 2025 11:14

ٹرافی واپس کریں : بی سی سی آئی ، بھارتی کپتان آکر مجھ سے وصول کرلے، محسن ..

دبئی (اردو پوائنٹ تازہ ترین اخبار ۔ یکم اکتوبر 2025ء ) ایشین کرکٹ کونسل (اے سی سی) کے صدر محسن نقوی نے کہا ہے کہ بھارتی ٹیم کو ایشیا کپ کی ٹرافی چاہیے تو بھارتی کپتان اے سی سی کے دفتر آکر مجھ سے وصول کرلے۔

محسن نقوی کی زیر صدارت دبئی میں ایشین کرکٹ کونسل کا اجلاس ہوا جس میں بھارتی کرکٹ بورڈ کے نائب صدر راجیو شکلا نے محسن نقوی سے ایشیا کپ کی ٹرافی مانگ لی۔

ذرائع کے مطابق صدر اے سی سی محسن نقوی کا کہنا تھا کہ یہ آئٹم اے سی سی میٹنگ کے ایجنڈے پر موجود نہیں ہے۔

ذرائع کے مطابق راجیو شکلا نے ٹرافی لینے کے لیے محسن نقوی سے مسلسل اصرار کیا تو انہوں نے جواب دیا کہ بھارتی ٹیم کو ٹرافی چاہیے تو کپتان اے سی سی کے دفتر آکر مجھ سے وصول کرلے۔

(جاری ہے)

ذرائع کا کہنا ہے کہ اجلاس میں بھارتی ٹیم کو ایشیا کپ کی ٹرافی دینے کے حوالے سے کوئی فیصلہ نہیں ہو سکا۔

خیال رہے کہ بھارتی کرکٹ ٹیم نے ایشیا کپ کا فائنل جیتنےکے بعد صدر ایشین کرکٹ کونسل (اے سی سی) محسن نقوی سے ٹرافی لینے سے انکار کردیا تھا۔

بھارتی ٹیم نے ایشین کرکٹ کونسل کے صدر محسن نقوی سے ٹرافی لینے سے انکار کیا تو صدر اے سی سی محسن نقوی بھی اپنے فیصلے پر ڈٹ گئے اور ایشیا کپ کی تقریب فاتح ٹیم کو ٹرافی دیے بغیر ہی ختم ہوگئی اور انتظامیہ ٹرافی اپنے ساتھ لے گئی۔

بھارتی ٹیم کھڑی انتظار کرتی رہ گئی لیکن ٹرافی بھارتی کرکٹ ٹیم کو نہیں دی گئی۔