سینٹ اینتھونی ہائی اسکول کے طلبہ کا الحمراء آرٹ میوزیم کا مطالعاتی دورہ

بدھ 1 اکتوبر 2025 16:04

لاہور (اُردو پوائنٹ اخبارتازہ ترین - این این آئی۔ 01 اکتوبر2025ء) لاہور آرٹس کونسل الحمراء کے زیر انتظام الحمراء ماڈرن آرٹ میوزیم ،کلچرل کمپلیکس میں سینٹ اینتھونی ہائی اسکول کے طلبہ کے وفد نے مطالعاتی دورہ کیا، جہاں انہوں نے پاکستان کے نامور مصوروں کے عظیم فن پاروں دیکھے۔ اس دورے نے طلبہ کے فنی شعور، جمالیاتی ذوق اور ثقافتی آگہی میں نمایاں اضافہ کیا۔

طلبہ نے جن فنکاروں کے فن پارے دیکھے ان میں عبدالرحمٰن چغتائی، استاد اللہ بخش، صادقین، شاکر علی، ایس صفدر، حنیف رامے، احمد پرویز، کولن ڈیوڈ، اسلم کمال، جمی انجینیئر، میری کیترینا، کامل خان، انامولیکا سمیت کئی بین الاقوامی شہرت یافتہ نام شامل ہیں۔یہ قابلِ فخر امر ہے کہ الحمراء آرٹ میوزیم میں 116 ممتاز فنکاروں کے 175 سے زائد شاہکار فن پارے موجود ہیں، جو نہ صرف پاکستان کے فنی ورثے کی نمائندگی کرتے ہیں بلکہ جنوبی ایشیا کی تہذیبی روح کی بھی عکاسی کرتے ہیں۔

(جاری ہے)

چیئرمین الحمراء رضی احمد نے کہا کہ فنونِ لطیفہ ایک معاشرے کی تہذیبی بصیرت اور فکری گہرائی کی علامت ہوتے ہیں، ہم نئی نسل کو اس روایت سے جوڑ کر اُن میں تخلیق، احساس اور شناخت کا شعور بیدار کرنا چاہتے ہیں۔ایگزیکٹو ڈائریکٹر الحمراء، محمد محبوب عالم چوہدری نے کہا کہ الحمراء آرٹ میوزیم نہ صرف تاریخ کا امین ہے بلکہ مستقبل کی نسلوں کے لیے ایک تخلیقی درسگاہ بھی ہے، جدید ذرائع ابلاغ کے ذریعے ہم اس ثقافتی خزانے کو دنیا بھر میں متعارف کرا رہے ہیں تاکہ پاکستان کا روشن چہرہ اجاگر ہو۔

اس دورے نے طلبہ کو یہ پیغام دیا کہ آرٹ صرف تصویری اظہار نہیں بلکہ قومی وقار، تہذیبی ورثے اور فکری بالیدگی کا آئینہ ہے۔ الحمراء آرٹ میوزیم آنے والے وقت میں بھی اپنی اس روایت کو قائم رکھتے ہوئے نوجوان نسل کو فنونِ لطیفہ سے روشناس کراتا رہے گا۔کیوریٹر الحمراء آرٹ میوزیم منیٰ ہارون نے وفد میں شامل مستقبل کے معماروں کو میوزیم کی تاریخ، خدمات بارے آگاہ کی۔