پاکستان خطے میں ایک عظیم ملک کے طور پر ابھر رہا ہے، گور نر سندھ

ہفتہ 4 اکتوبر 2025 22:40

کراچی (اُردو پوائنٹ اخبارتازہ ترین - اے پی پی۔ 04 اکتوبر2025ء) گورنر سندھ کامران خان ٹیسوری نے کہا ہے کہ پاکستان ترقی کی راہ پر گامزن ہے اور اب خطے میں ایک عظیم ملک کے طور پر ابھر رہا ہے، ہم نے اپنے سے پانچ گنا بڑے دشمن کو شکست دے کراسکی بالادستی ختم کی۔ہفتہ کو گورنر ہائوس سے جاری اعلامیہ کے مطابق ان خیالات کا اظہار گورنر سندھ نےTAFSMUN 2025کے افتتاح کے بعد تقریب سے خطاب کرتے ہوئے کیا۔

انہوں نے کہا کہ پاکستان میں ٹیلنٹ کی کمی نہیں، قطر کی ترقی میں 70فیصد حصہ پاکستانی انجینئرز کا ہے اور ورلڈ بینک میں سب سے زیادہ قابل افراد بھی پاکستانی ہیں۔انہوں نے کہا کہ گورنر ہائو س میں جاری مفت آئی ٹی کورسز کے ذریعے ہزاروں نوجوانوں کو ڈیجیٹل دنیا سے جوڑا جا چکا ہے۔ انہوں نے بتایا کہ تربیت کے دوران کئی نوجوان اب ہزاروں ڈالرز ماہانہ کمانے کے قابل ہو چکے ہیں۔

(جاری ہے)

گورنر سندھ نے اعلان کیا کہ انشااللہ آئی ٹی کورسز کا دائرہ پورے سندھ تک پھیلایا جائے گا تاکہ ہر نوجوان کو جدید ہنر سے آراستہ کیا جا سکے۔انہوں نے "امید کی گھنٹی" کا حوالہ دیتے ہوئے کہا کہ ہر شہری بلا خوف و خطر اپنی شکایات درج کروا سکتا ہے، کیونکہ گورنر ہائو س کے دروازے عوام کے لیے ہر وقت کھلے ہیں۔ رمضان المبارک کے دوران تین سالوں میں 13 لاکھ افراد نے گورنر ہائو س میں افطار کیا جبکہ 10لاکھ راشن باکس مستحق افراد میں تقسیم کئے گئے۔

گورنر سندھ نے نوجوانوں کو ترقی، ہنر اور مثبت سوچ کا پیغام دیتے ہوئے کہا کہ کامیابی چاہتے ہو تو منفی سوچ ذہن سے نکال دو، بڑی سوچ رکھو گے، تو بڑے کام کرو گے۔ ہنر پیدا کرو، یہی وقت کی ضرورت ہے۔انہوں نے تنقید کے بجائے تصحیح کی ضرورت پر زور دیتے ہوئے پاکستان میں پرائمری ایجوکیشن کمیشن کے قیام کی تجویز بھی پیش کی، جسے وقت کی اہم ضرورت قرار دیا۔