‘ملک اور قوم کے تحفظ کی خاطر شہادت کا رتبہ پانے والے پولیس افسران اور جوانوں کی قربانیں کبھی رائیگا ں نہیں جائیں گی، محمد طاہر

اتوار 5 اکتوبر 2025 20:45

Iکوئٹہ (اُردو پوائنٹ اخبارتازہ ترین - آن لائن۔ 05 اکتوبر2025ء) انسپکٹر جنرل آف پولیس بلوچستان محمد طاہر نے کہا کہ دہشتگردی سے نبرد آزما ہونے ملک اور قوم کے تحفظ کی خاطر شہادت کا رتبہ پانے والے پولیس افسران اور جوانوں کی قربانیں کبھی رائیگا ں نہیں جائیں گی۔پولیس عوام کے جان و مال کے تحفظ کو یقینی بنانے کیلئے کسی بھی قربانی سے دریغ نہیں کریگی۔

ان خیالات کا اظہار آئی جی پولیس بلوچستان محمد طاہر نے گوادر دورے کے موقع پر پولیس دربار میں افسران اور جوانوں سے خطاب کرتے ہوئے کیا ۔اس موقع پر ڈی آئی جی مکران رینج ڈاکٹر پرویز عمرانی، ایس ایس پی گوادر ضیا الحق مندوخیل اور دیگر پولیس افسران بھی موجود تھے۔آئی جی پولیس بلوچستان محمد طاہر نے اپنے دودرے کے دوران شہید محمد خماری کے گھر جا کر ان کے اہلِ خانہ سے تعزیت کی اور شہید کی بہادری، فرض شناسی اور عوامی خدمت کو خراجِ عقیدت پیش کیا۔

(جاری ہے)

آئی جی پولیس محمد طاہر نے کہا کہ شہید محمد خماری نے قیامِ امن کے لیے اپنی جان قربان کر کے پولیس فورس کا سر فخر سے بلند کیا۔ ان جیسے جوان ہمارے حقیقی ہیرو ہیں جن کی قربانیاں ہمیشہ یاد رکھی جائیں گی اور نئی نسلوں کے لیے مشعلِ راہ ثابت ہوں گی۔"آئی جی پولیس بلوچستان نے اس موقع پر اعلان کیا کہ گوادر سٹی تھانہ کو اب "تھانہ شہید محمد خماری" کے نام سے منسوب کر دیا گیا ہے، جو نہ صرف شہید کے خاندان بلکہ پوری پولیس فورس کے لیے باعثِ فخر ہے۔

انہوں نے اس عزم کا اظہار کیا کہ پولیس فورس اپنے شہدا کے اہلِ خانہ کو کبھی تنہا نہیں چھوڑے گی اور ان کی فلاح و بہبود کو ہر ممکن یقینی بنایا جائے گا۔آئی جی پولیس بلوچستان نے مزید کہا کہ عوام کا جانی و مالی تحفظ ہماری ذمہ داری ہے جس سے نبردآزما ہونے کے لئے ٹھوس اقدامات کئے جارہے ہیں۔