چیئرمین تعلیمی بورڈ راولپنڈی اورکنٹرولر امتحانات کے مختلف امتحانی مراکز کے ہنگامی دورے

پیر 6 اکتوبر 2025 20:02

راولپنڈی (اُردو پوائنٹ اخبارتازہ ترین - اے پی پی۔ 06 اکتوبر2025ء) چیئرمین بورڈ آف انٹرمیڈیٹ اینڈ سیکنڈری ایجوکیشن راولپنڈی محمد عدنان خان نے فتح جنگ ضلع اٹک جبکہ کنٹرولر امتحانات تنویر اصغر اعوان نے راولپنڈی کے مختلف امتحانی مراکز کے ہنگامی دورے کیے۔ترجمان کے مطابق امتحان میٹرک دوسرا سالانہ 2025 وزیرِ اعلیٰ پنجاب مریم نواز کے ویژن، صوبائی وزیر تعلیم ہائر ایجوکیشن رانا سکندر حیات کی رہنمائی اور حکومتِ پنجاب کی زیرو ٹالرنس پالیسی کے تحت شفاف اور منصفانہ ماحول میں جاری ہے۔

دوروں کے دوران چیئرمین بورڈ نے امتحانی انتظامات، سکیورٹی اقدامات اور امیدواروں کو فراہم کی جانے والی سہولیات کا تفصیلی جائزہ لیا۔ انہوں نے واضح کیا کہ امتحانی ایس او پیز کی خلاف ورزی کسی صورت برداشت نہیں کی جائے گی اور بوٹی مافیا کے عزائم کو خاک میں ملانے کے لیے جامع حکمتِ عملی پر عمل کیا جا رہا ہے۔

(جاری ہے)

کنٹرولر امتحانات تنویر اصغر اعوان نے امتحانی عملے کی حاضری، سی سی ٹی وی کیمروں اور نگرانی کے نظام کا باریک بینی سے جائزہ لیتے ہوئے ہدایت کی کہ عملہ امتحانات کی شفافیت کو قومی فریضہ سمجھ کر ذمہ داریاں نبھائے۔انہوں نے امتحانی انتظامات پر اطمینان کا اظہار کرتے ہوئے کہا کہ امتحانی عملہ دیانت داری سے فرائض انجام دے رہا ہے جو خوش آئند امر ہے۔