ڈرگ فری پنجاب،صوبہ بھر میں پنجاب پولیس کے انسدادِ منشیات آپریشنز جاری

پیر 6 اکتوبر 2025 18:45

لاہور (اُردو پوائنٹ اخبارتازہ ترین - این این آئی۔ 06 اکتوبر2025ء) انسپکٹر جنرل پولیس پنجاب ڈاکٹر عثمان انور کی ہدایت پر ڈرگ فری پنجاب ویژن کی تکمیل کے لیے صوبہ بھر میں پنجاب پولیس کے انسدادِ منشیات آپریشنز جاری ہیں۔ ترجمان پنجاب پولیس نے تفصیلات بتاتے ہوئے کہا کہ رواں سال کے دوران صوبہ بھر میں منشیات فروشوں کے ٹھکانوں پر 79 ہزار 531 چھاپے مارے گئے۔

منشیات کے دھندے میں ملوث 45 ہزار 868 ملزمان کو گرفتار کر کے ان کے خلاف مقدمات درج کیے گئے۔ گرفتار ملزمان کے قبضہ سے 27 ہزار 400 کلوگرام چرس، 2507 کلوگرام ہیروئن، 1628 کلوگرام آئس، 2555 کلوگرام افیون اور 6 لاکھ 13 ہزار 753 لیٹر شراب برآمد کی گئی۔صوبائی دارالحکومت لاہور میں پولیس نے انسدادِ منشیات کارروائیوں کے دوران 9 ہزار 531 منشیات فروشوں کو گرفتار کیا۔

(جاری ہے)

ملزمان کے قبضہ سے 4507 کلوگرام چرس، 511 کلوگرام ہیروئن، 928 کلوگرام آئس، 288 کلوگرام افیون اور 53 ہزار 507 لیٹر شراب برآمد کی گئی۔آئی جی پنجاب ڈاکٹر عثمان انور نے منشیات فروشوں، ڈیلرز اور سمگلرز کے خلاف اسپیشل آپریشنز میں مزید تیزی کا حکم دیا ہے۔ آئی جی پنجاب نے افسران کو ہدایت کی کہ سپلائی چین میں ملوث تمام ملزمان کو قانون کی گرفت میں لا کر انہیں سخت سزائیں دلوائی جائیں۔ڈاکٹر عثمان انور نے مزید کہا کہ تعلیمی اداروں اور ہاسٹلز کے گردونواح میں منشیات فروشی میں ملوث افراد کے خلاف کارروائیوں میں مزید تیزی لائی جائے تاکہ نوجوان نسل کو اس لعنت سے محفوظ رکھا جا سکے۔