پاکستان خلائی تحقیق پربھرپور توجہ دے رہا ہے ، وفاقی وزیر احسن اقبال کا ماڈل کالج فارگرلز میں ورلڈ اسپیس ویک کی اختتامی تقریب سے خطاب

جمعہ 10 اکتوبر 2025 17:20

اسلام آباد (اُردو پوائنٹ اخبارتازہ ترین - اے پی پی۔ 10 اکتوبر2025ء) وفاقی وزیر برائے منصوبہ بندی، ترقی و خصوصی اقدامات پروفیسر احسن اقبال نےکہا ہےکہ پاکستان خلائی تحقیق پر بھرپور توجہ دے رہا ہے کیونکہ کسی بھی قوم یا تہذیب کے عروج و زوال کا تعلق علم و تحقیق خصوصاً خلائی سائنس سے گہرا ہے۔ان خیالات کا اظہار انہوں نے ماڈل کالج فار گرلز میں ورلڈ اسپیس ویک کی اختتامی تقریب سے خطاب کرتے ہوئے کیا۔

پروفیسر احسن اقبال نے کہا کہ ماضی میں مسلمان سائنسدانوں نے فلکیات اور خلائی علوم میں دنیا کی رہنمائی کی جبکہ آج ٹیکنالوجی میں ترقی کرنے والے ممالک عالمی اثر و رسوخ حاصل کر چکے ہیں۔ وفاقی وزیر نے طلبا و طالبات پر زور دیتے ہوئے کہا کہ ہمیں ایسے محققین اور سائنسدانوں کی ضرورت ہے جو قوم کو علم اور تحقیق کی جانب راغب کریں۔

(جاری ہے)

ان کے مطابق جدید دنیا میں ہر شعبہ زندگی خلائی تحقیق سے منسلک ہو چکا ہے اور سیاروں کے سگنلز، کمیونیکیشن اور نیویگیشن سسٹمز قومی ترقی کے لیے بنیادی اہمیت رکھتے ہیں۔

احسن اقبال نے خبردار کیا کہ اگر ہم نے اب خلائی تحقیق پر توجہ نہ دی تو ہم دنیا کی دوڑ میں بہت پیچھے رہ جائیں گے۔انہوں نے بتایا کہ گزشتہ دو برسوں میں انہیں چین میں دو مختلف خلائی سیاروں کی لانچنگ میں شرکت کا اعزاز حاصل ہوا۔ انہوں نے کہا کہ خلائی تحقیق بچوں کی ذہنی صلاحیت، جستجو اور تخلیقی سوچ میں وسعت پیدا کرتی ہے۔احسن اقبال نے انکشاف کیا کہ آئندہ سال پاکستان کا پہلا خلا باز چینی سپیس سنٹر میں جائے گا جب کہ 2035 تک پاکستان کی خلائی ایجنسی کو چاند پر لینڈ کرنے کا مشن تفویض کیا گیا ہے۔تقریب کے اختتام پر وفاقی وزیر نے اسپیس ایگزیبیشن کا دورہ کیا، اسپیس واک میں شرکت کی اور ماڈل کالج اسلام آباد کے احاطے میں پودا لگایا۔