کامن ویلتھ کی مشترکہ اقدارعالمی سطح کے چیلنجز سے نمٹنے کے لیے ہماری سب سے بڑی طاقت ہیں ،چیئرمین سینیٹ

بارباڈوس (اُردو پوائنٹ اخبارتازہ ترین - اے پی پی۔ 10 اکتوبر2025ء) چیئرمین سینیٹ سید یوسف رضا گیلانی نے کہا ہے کہ کامن ویلتھ کی مشترکہ اقدارعالمی سطح کے چیلنجز سے نمٹنے کے لیے ہماری سب سے بڑی طاقت ہیں ،پارلیمنٹرینز کمزور طبقات کی آواز اور احتسابی عمل کے محافظ ہیں،پاکستان میں اقلیتوں کی فلاح وبہبود کے لئے بہتر اقدامات اٹھائے گئے ہیں ۔ انہوں نے ان خیالات کا اظہار یہاں 68 ویں کامن ویلتھ پارلیمنٹری کانفرنس کے ایک اہم سیشن کی صدارت کرتے ہوئے کیا جس کا عنوان ”بہتر طرز حکمرانی، کثیرالجہتی اور بین الاقوامی تعلقات میں دولت مشترکہ کا کردار‘‘ تھا،چیئرمین سینیٹ نے ؎کہا کہ آج کی جڑی ہوئی دنیا میں ہمارا اجتماعی عزم ہی یہ طے کرتا ہے کہ ہم جمہوری زوال، ماحولیاتی تبدیلی، مصنوعی ذہانت کا بڑھتا ہوا اثر یا جمہوری اداروں کے تحفظ جیسے چیلنجز کا سامناکس طرح کرتے ہیں۔

(جاری ہے)

اجلاس کا آغاز مختلف مقررین کی تقاریر اور پریزنٹیشنز سے ہوا جس کے بعد سوال و جواب پر مبنی ایک جامع اور تعمیری سیشن منعقد کیا گیا۔چیئرمین سینیٹ سید یوسف رضا گیلانی نے تمام مقررین اور شرکا ءکا ان کی بامعنی اور مثبت شرکت پر شکریہ ادا کیا۔جمعہ کو سینیٹ سیکرٹریٹ سے جاری بیان کے مطابق انہوں نے اجلاس کے تین اہم نکات پر روشنی ڈالی اور کہا کہ بیرونی سطح پر مضبوطی کے لیے داخلی سطح پر اچھی طرز حکمرانی ناگزیر ہے۔

انہوں نے کہا کہ کامن ویلتھ کی مشترکہ اقدار جو ”کامن ویلتھ چارٹر“ اور ”لیٹیمر ہائوس پرنسپلز“ میں بیان کی گئی ہیں، عالمی سطح کے چیلنجز سے نمٹنے کے لیے ہماری سب سے بڑی طاقت ہیں۔سید یوسف رضا گیلانی نے مزید کہا کہ پارلیمنٹرینز کمزور طبقات کی آواز اور احتسابی عمل کے محافظ ہیں۔انہوں نے تمام شرکا پر زور دیا کہ وہ ان مباحثوں کو دولت مشترکہ پارلیمانی ایسوسی ایشن (سی پی اے) کے مختلف نیٹ ورکس کے ذریعے آگے بڑھائیں جن میں ”کامن ویلتھ ویمن پارلیمنٹرینز نیٹ ورک“، ”سمال برانچز نیٹ ورک“ اور نئے اقدامات جیسے ”کامن ویلتھ اے آئی کنسورشیم“ شامل ہیں جو باہمی تعاون اور تجربات کے تبادلے کے لیے نہایت اہم پلیٹ فارمز مہیا کرتے ہیں۔

اجلاس میں شریک ایک رکن کے اقلیتوں سے متعلق سوال کا جواب دیتے ہوئے انہوں نے بتایا کہ پاکستان میں اقلیتوں کی فلاح وبہبود کے لئے بہتر اقدامات اٹھائے گئے۔ چیئرمین سینیٹ نے اپنے وزارت عظمیٰ کے دور کا ذکر بھی کیا اور کہا کہ انہوں نے اقلیتوں کے لئے علیحدہ وزارت قائم کی اور بین المذاہب ہم آہنگی کو فروغ دینے کے لئے اقدامات اٹھائے۔ چیئرمین سینیٹ نے اس تاثر کو یکسر مسترد کر دیا کہ انہوں نے بھارتی پارلیمانی وفد سے مصافحہ کرنے سے گریز کیا۔چیئرمین سینیٹ نے کہا میں نے بھارتی وفد سے مصافحہ کیا تھا ۔سید یوسف رضا گیلانی کے اس دوٹوک جواب پر ہال تالیوں سے گونج اٹھا،حاضرین نے ان کے کشادہ دلی اور بہترین سفارتی انداز کی بھرپور تحسین کی۔