ٹرمپ کو امن کا نوبیل انعام نہ دیے جانے پر وائٹ ہاؤس کی نوبیل کمیٹی پر تنقید

صدر ٹرمپ امن معاہدے کرتے رہیں گے، جنگیں ختم کرتے رہیں گے اور جانیں بچاتے رہیں گے، ترجمان وائٹ ہائوس

جمعہ 10 اکتوبر 2025 22:00

واشنگٹن (اُردو پوائنٹ اخبارتازہ ترین - این این آئی۔ 10 اکتوبر2025ء) امریکی صدر ڈونلڈ ٹرمپ کو امن کا نوبیل انعام نہ دیے جانے پر وائٹ ہاؤس نے نوبیل کمیٹی پر تنقید کی ہے۔تفصیلات کے مطابق رواں سال کے لیے امن کے نوبیل انعام کا اعلان کردیا گیا، معزز ترین اعزاز نوبیل انعام برائے امن 2025 وینزویلا کی ماریا کورینا مچاڈو نے اپنے نام کر لیا۔نوبیل کمیٹی کے مطابق امن نوبیل انعام وینزویلا کی جمہوریت نواز رہنما ماریا کورینا مچاڈو کے نام رہا۔

امریکی صدر ڈونلڈ ٹرمپ جنہوں نے بارہا اپنے بیانات میں اس سال نوبیل امن انعام کے لیے خود کو موزوں قرار دیا تھا، انعام نہ ملنے پر ناراضی کا اظہار کیا، وائٹ ہاؤس نے نوبیل کمیٹی کو ’’سیاسی جانبداری‘‘ کا مرتکب قرار دیا اس حوالے سے وائٹ ہاؤس کی ترجمان اسٹیون چیونگ نے سماجی رابطے کی ویب سائٹ پر بیان میں کہا کہ نوبیل کمیٹی نے ثابت کیا کہ وہ سیاست کو امن پر ترجیح دیتے ہیں، صدر ٹرمپ امن معاہدے کرتے رہیں گے، جنگیں ختم کرتے رہیں گے اور جانیں بچاتے رہیں گے۔

(جاری ہے)

وائٹ ہاوس ترجمان نے کہا کہ صدر ٹرمپ انسان دوست دل رکھتے ہیں۔یاد رہے کہ گزشتہ برس یہ انعام جاپانی تنظیم نیہون ہیدانکیو کو دیا گیا تھا، جبکہ 2023 میں ایرانی کارکن نرگس محمدی اور 2014 میں پاکستانی طالبہ ملالہ یوسفزئی کو یہ اعزاز حاصل ہوا تھا۔نوبیل کمیٹی نے اپنے بیان میں کہا کہ یہ انعام ہمیشہ اٴْن ’’بہادر مرد و خواتین‘‘ کے نام رہا ہے جنہوں نے ظلم و جبر کے مقابلے میں آزادی کی امید کو زندہ رکھا۔