بھارت،دوسرے شہر سے ماں کی میت لاتے ہوئے بیٹا ٹریفک حادثے میں ہلاک

جمعہ 10 اکتوبر 2025 22:00

روہتک (اُردو پوائنٹ اخبارتازہ ترین - این این آئی۔ 10 اکتوبر2025ء) بھارتی ریاست ہریانہ کے شہر روہتک میں جے پور سے ماں کی میت لانے والا نوجوان ٹریفک حادثے میں چل بسا۔ بھارتی میڈیا کے مطابق 24 سالہ کرات اور اس کے دو رشتہ دار خاتون کی میت جے پور سے ہریانہ لے جانے کیلئے ایمبولینس کے ساتھ اپنی کار میں سفر پر نکلے تھے کہ اس دوران روہتک کے ایک فلائی اوور پر ٹریفک حادثے میں تنیوں چل بسے، حادثے میں ان کی کار سڑک پر کھڑے ایک ٹرک سے جا ٹکرائی تھی۔

مرنے والا کرات اپنی والدہ جگندر کور کی میت لیکر گھر آرہا تھا، وہ جمعرات کو جے پور میں گردے کی پیوندکاری کے دوران چل بسی تھیں، خاتون اینٹی ٹیرارزم اسکواڈ (اے ٹی ایس) میں بطور اے ایس آئی خدمات انجام دے رہی تھیں۔پولیس کے مطابق گاڑی میں خاتون سمیت 4 افراد سوار تھے، حادثہ صبح ساڑھے 4 بجے پیش آیا، ٹکر اتنی شدید تھی کہ اس سے کار کا اگلا حصہ مکمل تباہ ہوگیا، اطلاع ملنے پر پولیس موقع پر پہنچی اور گاڑی کی کھڑکیاں کاٹ کر زخمیوں کو نکال کر ہسپتال منتقل کیا، جہاں 3 افراد کی موت کی تصدیق ڈاکٹرز نے کی جبکہ ان میں ایک خاتون دلبر شدید زخمی ہیں جو تشویشناک حالت میں زیر علاج ہیں۔

(جاری ہے)

میتیں پوسٹ مارٹم کے لیے سول ہسپتال منتقل کر دی گئی ہیں جبکہ کار اور ٹرک کو تحویل میں لے لیا گیا ہے، ابتدائی تحقیقات سے معلوم ہوا ہے کہ حادثے کی ممکنہ وجہ ڈرائیور کا ڈرائیونگ کے دوران اونگھ جانا ہے۔پولیس حکام کے مطابق خاندان رات گئے جے پور سے میت لانے کے بعد سفر میں تھا، غالباً ڈرائیور کو کھڑے ٹرک کا اندازہ نہیں ہوا اور گاڑی تیز رفتاری سے اس سے ٹکرا گئی۔