کراچی، دنداناتے تیز رفتار ڈمپر نے ایک اور شہری کی جان لے لی، دو افراد زخمی

مشتعل افراد نے پتھرائو کر کے ڈمپر کے شیشے توڑ دیے، زخمیوں کو طبی امداد دی جا رہی ہے، ریسکیو حکام

اتوار 12 اکتوبر 2025 13:05

کراچی(اُردو پوائنٹ اخبارتازہ ترین - این این آئی۔ 12 اکتوبر2025ء) شہر میں دنداناتے ہوئے تیز رفتار ڈمپر نے ایک اور شہری کی جان لے لی اور دو افراد شدید زخمی ہوگئے۔تفصیلات کے مطابق ایدھی سینٹر ٹاور کے سامنے تیز رفتار ڈمپر نے راہگیروں اور موٹر سائیکل سوار کو روند ڈالا جس کے نتیجے میں ایک نوجوان جاں بحق اور ایدھی کے رضا کار سمیت 3 افراد زخمی ہوگئے جس میں ایک کی حالت تشویش ناک بتائی جارہی ہے۔

حادثے کے بعد مشتعل افراد نے پتھراو کر کے ڈمپر کے شیشے توڑ دیے جبکہ ایدھی کے رضا کاروں نے متوفی کی لاش ضابطے کی کارروائی کے لیے سول اسپتال منتقل کر دی۔ریسکیو حکام کے مطابق کہ متوفی کی شناخت 25 سالہ باسط علی کے نام سے ہوئی جبکہ زخمی ہونے والے 55 سالہ شفیق، 28 سالہ جنید اور ایدھی کے رضا کار روشن کو طبی امداد فراہم کی جا رہی ہے۔

(جاری ہے)

ترجمان ایدھی فائونڈیشن کے مطابق ڈمپر حادثے کے نتیجے میں موقع پرموجود 3 ایمبولینسوں کو بھی جزوی نقصان پہنچا ہے اور اس حوالے سے مزید جانچ پڑتال کا عمل جاری ہے۔

ایس ایچ او کھارادر پون کمار نے بتایا کہ حادثے کے ذمہ دار ڈرائیور کو گرفتار کرلیا گیا ہے، حادثے میں موٹر سائیکل سوار اور ایدھی سینٹر کے سامنے کھڑے افراد زد میں آئے ہیں جس میں ایک راہگیر نوجوان جاں بحق ہوا ہے۔انہوں نے کہاکہ پولیس نے موقعے پر پہنچ کر صورت حال پر قابو پالیا ہے اور ڈمپر کو تھانے منتقل کیا، جائے وقوع اور اسپتال میں زیر علاج زخمیوں سے مزید معلومات حاصل کی جا رہی ہیں۔