الیسا نے بھارتی بولرز کی درگت بناتے ہوئے ون ڈے میں کئی سالوںبعد سنچری جڑدی

پیر 13 اکتوبر 2025 13:13

نئی دہلی (اُردو پوائنٹ اخبارتازہ ترین - این این آئی۔ 13 اکتوبر2025ء) آسٹریلیا کی ویمنز ٹیم کی کپتان الیسا ہیلی نے کئی سالوں بعد ون ڈے انٹرنیشنل میں سنچری اسکور کرڈالی، بھارتی بولرز کی جم کر دھلائی کی۔ بھارت اور آسٹریلیا کے درمیان آئی سی سی ویمنز ورلڈکپ کے مقابلے میں کینگرو کپتان الیسا ہیلی نے بھارتی بولرز کو نشانے پر رکھ لیا، آسٹریلوی بیٹر نے 2022 کے بعد ون ڈے میں اپنی پہلی سنچری اسکور کی۔

(جاری ہے)

ہدف کے تعاقب میں آسٹریلوی کپتان نے انتہائی جارحانہ انداز اپنایا، الیسا نے 107 گیندوں پر 142 رنز کی شاندار اننگز کھیلی۔سنچری بنانے کیلئے انھوں نے 3 بار گیند کو فضائی راستے سے باؤنڈری کی راہ دکھائی جبکہ 21 چوکے بھی ان کی جارحانہ اننگز میں شامل تھے۔وشاکا پٹنم میں ہونے والے ویمنز ورلڈکپ کے مقابلے میں بھارت نے پہلے کھیلتے ہوئے آسٹریلیا کو 331 رنز کا ہدف دیا تھا۔جواب میں آسٹریلیا نے ویمنز ون ڈے کا سب سے بڑا 331 رنز کا ہدف حاصل کیا، کینگروز خواتین نے بھارت کو 3 وکٹوں سے شکست دی۔