ملک میں پیٹرولیم مصنوعات کی قیمتوں میں نمایاں کمی کا امکان

اوگرا کو بھیجی گئی ورکنگ میں ایکسچینج ایڈجسٹمنٹ شامل نہیں‘ اوگرا کل سمری بھیجے گی

ساجد علی منگل 14 اکتوبر 2025 11:38

اسلام آباد ( اُردو پوائنٹ اخبارتازہ ترین۔ 14 اکتوبر2025ء ) ملک میں پیٹرولیم مصنوعات کی قیمتوں میں نمایاں کمی کا امکان ظاہر کردیا گیا۔ میڈیا رپورٹس کے مطابق ذرائع کا کہنا ہے کہ 16 اکتوبر سے پیٹرول کی قمیت میں 6 روپے 10 پیسے فی لیٹر کی کمی ہوسکتی ہے، ہائی سپیڈ ڈیزل کی قیمت میں ایک روپے کمی کا امکان ہے، مٹی کا تیل 2 روپے 75 پیسے اور لائٹ ڈیزل 1 روپیہ 64 پیسے سستا ہونے کی توقع ہے، تاہم اگر اگر حکومت نے لیوی ٹیکسز بڑھائے تو ریلیف کم یا ختم ہوسکتا ہے، انڈسٹری نے ورکنگ اوگرا کو بھیج دی ہے، اوگرا کو بھیجی گئی ورکنگ میں ایکسچینج ایڈجسٹمنٹ شامل نہیں، اوگرا کل سمری بھیجے گی، قیمتوں میں ردوبدل کا نوٹیفیکشن وزارت خزانہ جاری کرے گی۔

بتایا گیا ہے کہ یکم اکتوبر سے اب تک پیٹرول کی ایکس ریفائنری قیمت میں 3.76 فیصد کمی کے بعد نئی قمیت 162.96 سے کم ہوکر 158.86 روپے پر آچکی ہے، ہائی سپیڈ ڈیزل کی ایکس ریفائنری قمیت میں 0.6 فیصد کی معمولی کمی ریکارڈ کی گئی، ہائی سپیڈ ڈیزل کی ایکس ریفائنری قیمت 174.28 سے کم ہوکر 173.31 روپے ہوگئی، اسی طرح مٹی کے تیل کی ایکس ریفائنری قمیت میں دو ہفتوں کے دوران 1.8 فیصد کمی ہوئی، ایکس ریفائنری قیمت 156.61 روپے سے کم ہوکر 153.86 روپے پر آگئی، لائٹ ڈیزل کی ایکس ریفائنری قیمت میں بھی 1.1فیصد کمی ریکارڈ کی گئی اور ایکس ریفائنری قمیت 143.70 روپے سے کم ہوکر 142.06 روپے ہوگئی۔

(جاری ہے)

بتایا جارہا ہے کہ عالمی مارکیٹ میں پیٹرول اور ڈیزل کی قیمتیں گرچکی ہیں جہاں پیٹرول کی قیمت 76 ڈالر51 سینٹ سے کم ہوکر 73 ڈالر 71 سینٹ پر آگئی، عالمی مارکیٹ میں پیٹرول کی قیمت میں فی بیرل 2 ڈالر80 سینٹ کمی ریکارڈ کی گئی ہے، پیٹرول پر فی بیرل پریمئم میں 35 سینٹ کمی ہوئی، پیٹرول کی فی لیٹرقیمت میں 2 سینٹ کمی دیکھی گئی۔