شہداء کے خاندانوں اور غازی اہلکاروں کی فلاح و بہبود کیلئے تمام تر وسائل بروئے کار لائے جا رہے ہیں، سی سی پی او

منگل 14 اکتوبر 2025 16:27

پشاور (اُردو پوائنٹ اخبارتازہ ترین - اے پی پی۔ 14 اکتوبر2025ء) سی سی پی او پشاور ڈاکٹر میاں سعید احمد کی سربراہی میں منگل کو ملک سعد شہید پولیس لائن پشاور میں ایک پروقار تقریب منعقد ہوئی ۔ کیپٹل سٹی پولیس پشاور تر جمان کے مطابق تقریب میں ایس ایس پی آپریشنز مسعود احمد، ایس ایس پی کوآرڈی نیشن خالد خان سمیت دیگر پولیس افسران اور شہداء کے لواحقین بڑی تعداد میں شریک ہوئے۔

تقریب کے دوران مالی امداد کے تحت 150 پولیس شہداء کے لواحقین کو فی فیملی 50،000 روپے کے چیک پیش کیے گئے۔اس موقع پر سی سی پی او پشاور ڈاکٹر میاں سعید احمد نے خطاب کرتے ہوئے کہا کہ پشاور پولیس کی جانب سے شہداء کی فیملیز اور غازیوں کی فلاح و بہبود اور سہولت کے لیے اصلاحات اور ہر ممکن اقدامات جاری ہیں۔

(جاری ہے)

انہوں نے کہا کہ پولیس شہداء نے قیامِ امن اور عوام کے جان و مال کے تحفظ کے لیے اپنی جانوں کے نذرانے پیش کیے، ان کی قربانیاں ہمیشہ یاد رکھی جائیں گی۔

آئی جی پی خیبرپختونخواہ ذوالفقار حمید کے وژن کے مطابق شہداء کے خاندانوں اور غازی اہلکاروں کی فلاح و بہبود کے لیے تمام تر وسائل بروئے کار لائے جا رہے ہیں۔سی سی پی او نے مزید کہا کہ خیبرپختونخواہ پولیس دلیروں کی فورس ہے جس کی تاریخ بہادری، قربانی اور خدمت سے عبارت ہے۔ شہداء ہماری پہچان اور ہیرو ہیں جبکہ غازی ہماری شان ہیں جنہوں نے امن کے قیام کے لیے ناقابلِ فراموش خدمات انجام دیں۔