پاکستان ،آئی ایم ایف میں1.2ارب ڈالر قسط کیلئے بات چیت حتمی مراحل میں داخل

وزیرخزانہ آئی ایم ایف کیساتھ رواں ہفتے سٹاف لیول معاہدے کیلئے پرامید

منگل 14 اکتوبر 2025 21:20

اسلام آباد (اُردو پوائنٹ اخبارتازہ ترین - این این آئی۔ 14 اکتوبر2025ء) پاکستان اور آئی ایم ایف کے درمیان 1.2ارب ڈالر کی قسط کیلئے بات چیت حتمی مراحل میں داخل ہو گئی ۔

(جاری ہے)

وفاقی وزیرخزانہ محمد اورنگزیب نے غیر ملکی میڈیا سے گفتگو کرتے ہوئے کہا کہ آئی ایم ایف مشن کے ساتھ مثبت اور تعمیری مذاکرات ہوئے، اسٹاف لیول معاہدے کے بعد 1.24ارب ڈالر کی نئی قسط جاری ہوگی، معاہدہ رواں ہفتے مکمل ہونے کی توقع ہے، پاکستان رواں سال کے آخر تک پہلا گرین پانڈا بانڈ جاری کرے گا، اگلے سال عالمی مارکیٹ میں کم از کم 1ارب ڈالر کے بانڈ اجرا کا منصوبہ ہے۔

وزیرخزانہ نے کہا کہ یورو، ڈالر، سکوک سمیت تمام آپشنز زیر غور ہیں، حکومت رواں مالی سال کے دوران نجکاری کے عمل میں تیزی لائے گی۔ذرائع کے مطابق پی آئی اے اور تین بجلی تقسیم کار کمپنیوں کی فروخت میں پیشرفت ہوئی ہے ، پی آئی اے کیلئے پانچ ملکی و مقامی سرمایہ کار گروپس کی دلچسپی ہے، پی آئی اے کی فروخت سے دو دہائیوں بعد بڑی نجکاری متوقع ہے۔