اسلام آباد میں ٹریفک معمول کے مطابق رواں دواں، میٹرو بس سروس بھی مکمل بحال

بدھ 15 اکتوبر 2025 13:08

اسلام آباد(اُردو پوائنٹ اخبارتازہ ترین - این این آئی۔ 15 اکتوبر2025ء) وفاقی دارالحکومت کے تمام داخلی و خارجی راستوں پر ٹریفک معمول کے مطابق رواں دواں رہی، جڑواں شہروں میں چلنے والی میٹرو بس سروس بھی مکمل طور پر بحال ہو چکی ہے۔اسلام آباد ٹریفک پولیس کے مطابق شہر کے تمام داخلی و خارجی راستوں پر ٹریفک معمول کے مطابق چل رہا ہے اور پولیس اہلکار ٹریفک کی روانی برقرار رکھنے کیلئے مختلف مقامات پر تعینات رہی۔

(جاری ہے)

ترجمان اسلام آباد پولیس کے مطابق چیف ٹریفک آفیسر کیپٹن (ر) حمزہ ہمایوں ذاتی طور پر تمام ٹریفک ڈیوٹیز کی نگرانی کر تے رہے۔ انہوںنے بتایا کہ لین وائلیشن، ون ویلنگ، غلط سمت میں ڈرائیونگ اور فینسی نمبر پلیٹس کے خلاف کارروائی جاری ہے۔پولیس نے شہریوں سے اپیل کی کہ وہ ٹریفک قوانین کی مکمل پابندی کریں، موٹرسائیکل سوار اور بڑی گاڑیاں اپنی لین میں رہیں اور ٹریفک اہلکاروں کے ساتھ تعاون کریں۔دوسری جانب جڑواں شہروں میں چلنے والی میٹرو بس سروس بھی مکمل طور پر بحال ہو چکی ہے۔ضلعی انتظامیہ کے مطابق میٹرو بس سروس 4 روز کے بعد صدر سٹیشن تا پاک سیکرٹریٹ تک مکمل بحال ہوگئی ہے۔