نمل میں اطالوی زبان کے بین الاقوامی دن’’ایتالوفونی: سرحدوں سے ماورا زبان‘‘ کی مناسبت سے تقریب کا انعقاد

اسلام آباد (اُردو پوائنٹ اخبارتازہ ترین - اے پی پی۔ 15 اکتوبر2025ء) نیشنل یونیورسٹی آف ماڈرن لینگویجز (نمل) کے شعبہ اطالوی و فرانسیسی زبان نے اطالوی زبان کے بین الاقوامی ہفتے 2025 کے حوالے سے بعنوان’’ایتالوفونی: سرحدوں سے ماورا زبان‘‘ تقریب کا اہتمام کیا۔ اٹلی کی سفیر مارلینا آرمیلین نے تقریب میں بطور مہمان خصوصی شرکت کی۔ تقریب میں ریکٹر نمل میجر جنرل (ر) شاہد محمود کیانی، ڈائریکٹر جنرل نمل بریگیڈیئر محمد رفیق خان، ڈین فیکلٹی آف لینگویجز ڈاکٹر جمیل اصغر جامی، شعبہ جات کے سربراہان، اساتذہ اور طلبہ نے شرکت کی۔

ابتدائی کلمات میں ڈاکٹر جمیل اصغر جامی نے اطالوی زبان کے بین الاقوامی ہفتے کی اہمیت پر روشنی ڈالی اور اطالوی سفیر کا خیرمقدم کیا۔ اپنے خطاب میں اٹلی کی سفیر مارلینا آرمیلین نے نمل کی جانب سے پاکستان میں اطالوی زبان اور ثقافت کے فروغ کے لئے کی جانے والی کوششوں کو سراہا۔

(جاری ہے)

انہوں نے پاکستانی نوجوانوں کی اطالوی زبان سیکھنے میں دلچسپی پر خوشی کا اظہار کیا، جو دونوں ممالک کے درمیان بڑھتے ہوئے ثقافتی تعلقات اور باہمی احترام کی عکاسی کرتی ہے۔

انہوں نے مزید کہا کہ ہزاروں پاکستانی اٹلی کی ترقی میں اپنا کردار ادا کر رہے ہیں جو دونوں ممالک کے درمیان دوستی اور تعاون کے مضبوط رشتے کی علامت ہے۔پروگرام آفیسر اطالوی ایجنسی برائے ترقیاتی تعاون، اسلام آباد ڈاکٹر سائرہ احمد نے ’’اطالوی ثقافت کی رنگا رنگی کے سفر‘‘ کے عنوان سے ایک معلوماتی پریذنٹیشن دی جس میں اٹلی کے فنون اور ثقافت کی گہرائی اور تنوع کو اجاگر کیا گیا۔

اس موقع پر ریکٹر نمل میجر جنرل (ر) شاہد محمود کیانی نے اپنے خطاب میں کہا کہ یہ دن صرف ایک زبان کے احترام کے لئے نہیں بلکہ ایک ایسی تہذیب کو خراج تحسین پیش کرنے کے لئے منایا جا رہا ہے جس نے صدیوں سے فن، فکر اور ثقافت کو نئی جہتیں دی ہیں۔ انہوں نے کہا کہ زبان صرف رابطے کا ذریعہ نہیں بلکہ یہ ثقافت، شناخت اور تخلیقی صلاحیتوں کی محافظ ہوتی ہے۔

اطالوی زبان، جو دنیا بھر میں تقریباً 85 ملین افراد بولتے ہیں، موسیقی، فنون لطیفہ، شاعری اور فلسفے کی زبان ہے۔ ریکٹر نے مزید کہا کہ نمل کا اطالوی شعبہ، جو 2007 میں قائم ہوا، اطالوی سفارتخانے اور اے آئی سی ایس کے ساتھ مضبوط تعاون کے ذریعے بین الثقافتی فہم کو فروغ دے رہا ہے۔ انہوں نے شعبے کی خدمات کو نمل کے مشن ’’دنیا کو زبانوں کے ذریعے سمجھنے‘‘ کا عملی مظہر قرار دیا۔

طلبہ کو مخاطب کرتے ہوئے انہوں نے کہا کہ آپ اس بات کا ثبوت ہیں کہ تعلیم کتابوں اور کلاس رومز تک محدود نہیں بلکہ یہ قوموں، ثقافتوں اور انسانوں کے درمیان پل ہے، زبانیں سیکھتے رہیں، دنیا سے جڑے رہیں اور وہ رشتے بناتے رہیں جو انسانیت کو قریب لاتے ہیں۔تقریب کے اختتام پر پاکستان اور اٹلی کے درمیان لسانی و ثقافتی تعلقات کو مزید فروغ دینے کے عزم کا اعادہ کیا گیا۔